Yevropa ittifoqi Armanistonga «fuqarolik missiyasi» yuboradi

Yevropa ittifoqi Ozarboyjon bilan chegaralarni delimitatsiya qilishda yordam berish uchun Armanistonga «fuqarolik missiyasi»ni yuboradi. Bu haqda 7 oktyabr, juma kuni Pragada Armaniston bosh vaziri Nikol Pashinyan, Ozarboyjon prezidenti Ilhom Aliyev, Fransiya prezidenti Emmanuel Makron va Yevropa kengashi raisi Sharl Mishelning bir necha soatlik uchrashuvidan so‘ng ma’lum qilindi.

Muzokaralardan so‘ng berilgan bayonotga ko‘ra, missiya oktabr oyida o‘z ishini boshlaydi va maksimal ikki oy davom etadi. Uning maqsadi - «ishonchni mustahkamlash va chegara komissiyalari ishiga hissa qo‘shish», deyiladi hujjatda. Unda, shuningdek, Armaniston va Ozarboyjon BMT nizomi va «1991 yildagi Olmaota deklaratsiyasiga sodiqligini yana bir bor tasdiqlagan, unda har ikki tomon bir-birining hududiy yaxlitligi va suverenitetini tan oladi».

Armaniston va Ozarboyjon o‘rtasida Tog‘li Qorabog‘ bo‘yicha uzoq vaqtdan beri davom etayotgan to‘qnashuv bir necha bor to‘laqonli harbiy harakatlarga aylanib ketgan. O‘tgan oyning o‘zida har ikki tomondan kamida 286 kishi halok bo‘ldi, bu AQSh vositachiligidagi sulh 2020 yildan beri Boku va Yerevan o‘rtasidagi qurolli to‘qnashuvlarga barham berguniga qadar kuzatildi. To‘qnashuvlar davomida 6500 kishi hayotdan ko‘z yumdi. 

AFP agentligining ta’kidlashicha, Ukrainada urush boshlagan Moskva mintaqaga qiziqish va ta’sirini yo‘qotgan. Bunday vaziyatda AQSh va Yevropa ittifoqi Armaniston va Ozarboyjon o‘rtasidagi munosabatlarni normallashtirish jarayoniga vositachilik qilishda yetakchi rol o‘ynaydi.