Germaniya kansleri va Turkiya prezidenti Rossiyaning yadroviy ritorikasini qoraladi

Germaniya kansleri Olaf Shols va Turkiya prezidenti Rajab Toyyib Erdo‘g‘an telefon orqali suhbat chog‘ida Rossiyaning yadroviy ritorikasini qoraladi. Ikki davlat rahbarlari o‘rtasidagi suhbat 1 noyabr, seshanba kuni bo‘lib o‘tdi, dedi Germaniya hukumati matbuot kotibi Shteffen Xebstreyt. «Germaniya kansleri va Turkiya prezidenti Rossiyaning yadroviy ritorikasi - mas’uliyatsizlik degan fikrga kelishdi», — dedi Xebstreyt. 

Shols Rossiyaning Ukraina «iflos bomba» deb atalgan narsadan foydalanishga tayyorlanayotgani haqidagi da’volarini qat’iyan rad etdi. 

Bundan tashqari, tomonlar o‘z suhbatida «g‘alla bitimi»ga ham to‘xtalib o‘tishdi. Germaniya kansleri Turkiyaning kelishuv doirasida Ukraina g‘allasining kelgusida eksport qilinishini ta’minlash borasidagi sa’y-harakatlarini yuqori baholadi. 

Germaniya hukumati rahbari bir kun avval Ukraina prezidenti Volodimir Zelenskiy bilan suhbatda Rossiyaning Kiyev «iflos bomba»dan foydalanishga tayyorgarlik ko‘rayotgani borasidagi ayblovi asossiz, degan fikrni bildirdi. Bundan tashqari, Shols Rossiya qo‘shinlari tomonidan Ukrainadagi fuqarolik infratuzilmasini nishonga olish davom etayotganini qoraladi. 

Rossiyaning Kiyevni «iflos bomba ishlatishga tayyorlanayotgani» haqidagi ayblovlaridan so‘ng, 31 oktyabr kuni Atom energiyasi bo‘yicha xalqaro agentlik (AEXA) inspektorlari Ukraina hukumati iltimosiga ko‘ra, Ukrainadagi ikkita yadroviy inshootni tekshirishni boshladi. Ular shu hafta oxirigacha tekshiruv bo‘yicha dastlabki hisobotni chop etishga va’da berishdi. 

Ayni paytda, so‘nggi bir necha hafta ichida Rossiya prezidenti Vladimir Putin va boshqa rossiyalik rasmiylar Moskva o‘zining yadroviy doktrinasida nazarda tutilgan vaziyatlarda yadro qurolidan foydalanishi mumkinligini bir necha bor ta’kidlagan. Ushbu hujjatda aytilishicha, Rossiya o‘ziga yoki ittifoqdoshlariga yadro quroli yoki boshqa ommaviy qirg‘in qurollari yordamida hujumga javoban yoki oddiy qurollar bilan tajovuz qilingan taqdirda, agar «davlatning mavjudligi xavf ostida bo‘lsa, yadroviy quroldan foydalanishi mumkin».

Oktabr oxirida Vladimir Putin «Valday» xalqaro munozara klubining yalpi majlisida Ukraina go‘yoki «iflos bomba»ni portlatishni rejalashtirayotgani va buning uchun Rossiyani ayblashini aytdi. «Ular uni «Tochka-U»ga yoki boshqa joyga yuklab, bu qurilmani qayerdadir portlatadi, keyin esa Rossiya buni qildi - yadroviy zarba berdi, deyishadi. Lekin biz buni qilishimiz shart emas. Bizda bu na siyosiy, na harbiy jihatdan kerak emas», dedi u. Shu bilan birga, AQSh prezidenti Jo Bayden Putinning so‘zlariga shubha bilan qaradi va uning yondashuvini «juda xavfli» deb atadi.