Shvetsiyada Rossiya foydasiga josuslikda ayblangan ikki aka-uka sudga tortildi

Shvetsiyada 25 noyabr, juma kuni Rossiya foydasiga josuslikda ayblangan ikki aka-uka sudga tortildi. Prokuratura vakillarining ta’kidlashicha, 42 va 35 yoshli ikki erkak Shvetsiya razvedka va xavfsizlik xizmatlariga qarshi qaratilgan harakatlarda ayblanmoqda. Ular 2021 yilda hibsga olingan va o‘zlariga qo‘yilgan barcha ayblovlarni rad etyapti.

Ish materiallariga ko‘ra, aka-uka o‘n yil davomida Rossiya harbiy razvedkasi - «GRU»ga maxfiy ma’lumotlarni uzatgan. Aka-ukalarning kattasiga ham maxfiy ma’lumotlarni ruxsatsiz ishlatish ayblovi qo‘yilgan.

Advokat Anton Strandning aytishicha, uning mijozi hamon ayblovlarni rad etyapti. «U Shvetsiya hukumatida turli lavozimlarda ishlagan va o‘ta og‘ir sharoitda o‘z vazifalarini vijdonan bajarish uchun har doim bor kuchini sarflagan», — dedi Strand. Boshqa erkakning advokatidan izohlar hali olinmagan.

Sud jarayoni asosan yopiq eshiklar ortida o‘tadi. U kamida 12 dekabrgacha davom etadi.

Shu hafta Shvetsiya politsiyasi yana ikki kishini josuslikda gumon qilib qo‘lga oldi. Ulardan biri Shvetsiya va boshqa davlatga qarshi qaratilgan noqonuniy razvedka faoliyatida gumon qilinmoqda. Politsiya hibsga olinganlar qaysi davlat fuqarosi ekanligi va kimga ishlaganiga aniqlik kiritmadi.

Rossiyaning Ukrainaga qarshi urushi oqibatida xalqaro keskinlik kuchaygan bir paytda o‘nlab yillar davomida betaraf bo‘lib kelgan Shvetsiya tez orada NATOga a’zo bo‘lishga umid qilmoqda.