Turkmanistonda aviachipta chayqovchilari uzoq muddatga qamaldi

Bu haqda TDH davlat axborot agentligining Davlat xavfsizlik kengashi yig‘ilishi yakunlari bo‘yicha xabarida ma’lum qilindi. Mahkumlar TV orqali kechki «Vatan» dasturi efirida namoyish etildi.

Qayd qilinishicha, «Turkmenistan Airlines» rahbari vazifasini bajaruvchi Kerim Kerimov va uning tanishlari Abdirasul Mommadov va Chori Meredov, shuningdek, kassir Jyennet Gochgarugliyeva va uning sherigi To‘yguli Ortiqniyazov aviakompaniyadagi korrupsiya ishi bo‘yicha ayblanuvchi sifatida jalb qilingan. Tergov ma’lumotlariga ko‘ra, ularning barchasi aviachiptalarni davlat tomonidan belgilanganidan yuqori narxda sotgan.

Sud hukmi bilan Kerimov 13 yil, Gochgarugliyeva 8 yil 3 oy, Mommadov va Meredov har biri 12 yil, Ortiqniyazov esa 11 yil qamoq jazosiga hukm qilingan. Ularning jinoiy daromadlari davlat foydasiga musodara qilingan.

Prezident Serdar Berdimuhamedov bunga izoh berar ekan, «korrupsiya Vatanning ijtimoiy-iqtisodiy rivojlanishiga to‘sqinlik qiladi, aholi hayotiga zarar yetkazadi», deb ta’kidlagan.