Rossiya «Qambar ota-1» GES qurilishida ishtirok etmoqchi

Qirg‘izistonda qurilishi rejalashtirilgan ushbu GES Qirg‘iziston, O‘zbekiston va Qozog‘iston ishtirokidagi loyiha ekani aytilgan edi.

Foto: Kazinform

Rossiya «Qambar ota-1» GES qurilishida ishtirok etmoqchi. Bu haqda Qirg‘iziston parlamentining yoqilg‘i-energetika kompleksi, yer qa’ridan foydalanish va sanoat siyosati qo‘mitasi yig‘ilishida energetika vaziri Taalaybek Ibrayev ma’lum qildi.

Uning so‘zlariga ko‘ra, davlat kelajakda 1860 megavatt elektr energiyasi ishlab chiqarishga qodir bo‘lgan GES qurish bo‘yicha megaloyihani boshlamoqda.

«Agar GES qurilsa, undan o‘zimiz foydalanamiz. Ishtirokchilar esa qurilishga qancha hissa qo‘shgan bo‘lsa, shuncha elektr energiyasi oladi. Hozir Rossiya ham bizga murojaat qildi va loyihaga qo‘shilib, moliyalashtirmoqchi», dedi Taalaybek Ibrayev.

6 yanvar kuni Qirg‘iziston, Qozog‘iston va O‘zbekiston energetika vazirlari «Qambar ota-1» GES qurilishini amalga oshirish bo‘yicha yo‘l xaritasini imzolagan edi.

Tayyorlagan: Сардор Юсупов

#O‘zbekiston #Qirg‘iziston #Rossiya #Qozog‘iston #Qambar ota-1 GES