Ukraina bosh vaziri AQShdan aviatsiya va raketalar berishni so‘radi

AQSh mudofaa vaziri Ostin bilan uchrashuvda Shmigal Qo‘shma Shtatlarni Kiyevga qiruvchi samolyotlar yetkazib berish bo‘yicha koalitsiyaga qo‘shilishga chaqirdi. Uning ta’kidlashicha, Ukraina «o‘zini va Yevropani himoya qilish» uchun ko‘proq og‘ir texnikaga muhtoj.

Ukraina bosh vaziri Denis Shmigal 12 aprel, chorshanba kuni AQSh mudofaa vaziri Lloyd Ostin bilan uchrashuvda uzoq masofali raketalar, F-15 va F-16 qiruvchi-bombardimonchi samolyotlari, shuningdek, qo‘shimcha zirhli mashinalar va boshqa qurollarni so‘radi. 

«Ukraina hali ham faol harbiy yordamga, havo hujumidan mudofaa tizimlariga, shuningdek, og‘ir artilleriya, minomyot va o‘q-dorilarga muhtoj. Shuningdek, Ukrainani uzoq masofali raketalar bilan ta’minlash imkoniyatini qayta ko‘rib chiqishingizni so‘raymiz», - dedi Shmigal Pentagonda.

Ukraina bosh vaziri yana bir bor AQShni Kiyevga qiruvchi samolyotlar yetkazib berish bo‘yicha koalitsiyaga a’zo bo‘lishga chaqirdi. «Amerika Ukrainani F-15 va F-16 samolyotlari bilan ta’minlash orqali yana o‘zining yetakchilik rolini namoyish qilishi mumkin», - dedi u.

«O‘zimizni va Yevropani himoya qilish uchun bizga ko‘proq og‘ir texnika, shuningdek, samolyotlar kerak. Biz AQShning tank koalitsiyasiga qo‘shilish va Ukrainaga Abrams tanklari, shuningdek, Bradley va Stryker piyoda jangovar mashinalarini yetkazib berish haqidagi qarorini olqishlaymiz. Qarama-qarshi hujum muvaffaqiyati uchun bunday ta’minotni ko‘paytirish kerak», dedi Shmigal.

Avvalroq Ukraina bosh vaziri mamlakat qurolli kuchlarining bosib olingan hududlarni ozod qilish bo‘yicha qarshi hujumi yozgacha qoldirilishi mumkinligini ma’lum qilgandi.

«Biz do‘stlarimiz va hamkorlarimiz tomonidan hujum boshlanishi vaqti bo‘yicha bosim sezmayapmiz, - dedi u Amerikaning The Hill nashriga bergan intervyusida. - Bizning barcha do‘stlarimiz va hamkorlarimiz hujumga o‘tish uchun bunga 100 foiz va undan ko‘proq tayyor bo‘lish kerakligini tushunishadi».

AQSh razvedkasi Ukraina qo‘shinlari konsentratsiyasi, o‘q-dorilar va jihozlar taqchilligi bilan bog‘liq muammolar Kiyevning rejalashtirilgan qarshi hujumi haqidagi taxminlarga mos kelmaydi, deb hisoblaydi va aftidan, bosib olingan hududlarning faqat kichik bir qismini Rossiyadan qaytarib olishga imkon beradi, deb yozadi The Washington Post gazetasi 10 aprel kuni internetdagi manbalar va maxfiy hujjatlarga asoslanib.

Nashr fevral oyiga borib taqaladigan «o‘ta maxfiy» hujjatlarga iqtibos keltirgan bo‘lib, unda Ukraina hujumi «kamtarona hududiy yutuqlarga» olib kelishi mumkinligi aytiladi. Kiyev Ukraina sharqidagi hududlarni qaytarib olishni va Rossiya armiyasini annexia qilingan Qrimdan uzib qo‘yish uchun janubda olg‘a siljishni rejalashtirmoqda, biroq «kuchli Rossiya mudofaasi, ukrainalik askarlarning yetarlicha ta’minlanmagani va tayyor emasligi oldinga siljishni to‘xtatib qo‘yishi, yo‘qotishlarni kuchaytirishi mumkin», deb hisoblaydi AQSh razvedkasi.