“Bu lavozim vakant emas-ku” - fuqaro viloyat hokimidan vazir bo‘lishiga yordam berishini so‘radi

3 may kuni Bo‘ka tumanida bo‘lib o‘tgan sayyor qabulda fuqarolardan biri Toshkent viloyati hokimiga vazir bo‘lish istagida ekanini aytib, bu boradagi murojaatlaridan natija bo‘lmayotgani, shu sababli prezident bilan uchrashganda uni vazir lavozimiga tavsiya qilishini so‘radi.

“Prezidentga ikki yildan beri aloqa vaziri lavozimiga da’vogar ekanim to‘g‘risida murojaat qilib kelaman. Har safar yozganimda vazirlik faoliyatiga qanday o‘zgartirishlar kiritmoqchi ekanimni izohlab berganman”, deydi Saydulla Jo‘rayev ismli murojaatchi.

Zoyir Mirzayev erkakning so‘zlarini tinglar ekan: “Bu lavozim vakant emas-ku” deya ta’kidlagan. Vazir bo‘lish istagidagi fuqaro bunga qanday javob bergani noma’lum, chunki Toshkent viloyati hokimligining Facebook'dagi sahifasida e’lon qilingan videodan murojaat muallifining so‘zlarini eshitib bo‘lmadi.

“O‘zi amalparast emasman. Men bilan hech bo‘lmasa suhbat ham qilinmayapti. Men aloqa vazirligi bo‘lmoqchiman deb yozgan arizalarimni vazirlikning o‘ziga jo‘natishyapti. Yoki GISga (Davlat aloqa inspeksiyasining rus tilidagi qisqartmasi – tahr.) jo‘natadimi-yey. Nuqul shunaqa sansalor bo‘lib yotibdi”, deydi murojaatchi.

Fuqaro bilan muloqot davomida viloyat hokimi undan prezident huzuridagi Davlat xizmatini rivojlantirish agentligi haqida ma’lumotga egami yoki yo‘q, uning manzilini bilish-bilmasligini so‘ragan. U tashkilot haqida ma’lumotga ega ekanini bildirgan.

Shundan so‘ng Zoyir Mirzayev viloyat hokimligining Tashkiliy-kadrlar guruhi rahbari Muzaffar Oripovni yoniga chaqirgan.

“Agentlikka Otabek Hasanov ismli yigit rahbarlik qiladi. Milliy kadrlar zaxirasini u shakllantiradi. Nomzodlarni o‘qitadi, tayyorlaydi, taqsimlaydi. Hozir viloyat hokimligi Tashkiliy-kadrlar guruhi rahbari Muzaffar Oripov sizga kerakli yo‘l-yo‘riq ko‘rsatadi”, degan Toshkent viloyati hokimi.

Biroq fuqaro ushbu javobdan qoniqmasdan, Zoyir Mirzayevdan prezidentga o‘zini vazirlikka tavsiya qilishni so‘ragan.

“Sizdan bitta iltimosim bor, bu – shaxsiy iltimos. Uka sifatida. Prezident bilan uchrashasiz-ku, meni tavsiya qiling, iltimos. Aloqa vaziri bo‘lishga  bitta da’vogar yigit bor deb ayting. Men bemalol vazir bo‘la olaman. Qancha suhbat bo‘lsa tayyorman”, degan u.

Eslatib o‘tamiz, 2023 yilning 1 yanvaridan Raqamli texnologiyalar vazirligi deb nomlangan davlat organi 1955–1997-yillarda Aloqa vazirligi sifatida faoliyat ko‘rsatgan. Ushbu muassasa 1997–2002 yillarda Pochta va telekommunikatsiyalar agentligi, 2002–2012 yillarda Aloqa va axborotlashtirish agentligi, 2012–2015 yillarda Aloqa, axborotlashtirish va telekommunikatsiya texnologiyalari davlat qo‘mitasi, 2015–2022-yillarda Axborot texnologiyalari va kommunikatsiyalarini rivojlantirish vazirligi deb yuritilgan.

Bugungi kunda Raqamli texnologiyalar vazirligiga Sherzod Shermatov rahbarlik qilmoqda.