Ukrainada yangi bosh vazir tayinlanishi kutilmoqda

Bu haqda Ukraina Oliy radasi raisi Ruslan Stefanchuk ma’lum qildi. Uning aytishicha, prezident tomonidan yuborilgan taqdimnoma parlamentga rasman kelib tushgan va deputatlar uni yaqin majlisda ko‘rib chiqadi.

Bosh vazir lavozimi 14 iyul kuni Yuliya Sviridenkoning iste’fosi qabul qilinganidan keyin bo‘shagan edi. Ukraina qonunchiligiga muvofiq, bosh vazirning iste’fosi butun hukumatning vakolatlari tugashini anglatadi. Sviridenko hukumatga 2025 yil 17 iyuldan rahbarlik qilib kelayotgan edi.

Oliy rada deputati Yaroslav Jyeleznyakning ma’lum qilishicha, bosh vazirlik uchun dastlab to‘rt nafar ehtimoliy nomzod muhokama qilingan. Ular orasida «Naftogaz» rahbari Sergey Koretskiy, energetika vaziri Denis Shmixal, mudofaa vaziri Mixail Fedorov hamda Xarkiv shahri meri Igor Terexov bor edi.

Keyinroq prezident Volodimir Zelenskiy o‘tkazilgan maslahatlashuvlar yakunlari bo‘yicha Sergey Koretskiyni mazkur lavozim uchun eng munosib nomzod deb hisoblashini ma’lum qildi.

Hukumat tarkibi ham o‘zgaradi

16 iyul kuni bo‘lib o‘tadigan parlament majlisida nafaqat bosh vazir, balki yangi vazirlar mahkamasi tarkibi ham ovozga qo‘yilishi rejalashtirilgan.

Dastlabki ma’lumotlarga ko‘ra, hukumatdagi eng muhim o‘zgarishlardan biri Mudofaa vazirligida bo‘ladi. Amaldagi mudofaa vaziri Mixail Fedorov lavozimini tark etishi kutilmoqda. Uning o‘rniga hozirgi ichki ishlar vaziri Igor Klimenko nomzodi ilgari surilgan.

Ichki ishlar vaziri lavozimiga esa hozirgi Milliy politsiya rahbari Ivan Vigovskiy tayinlanishi rejalashtirilmoqda.

Shu bilan birga, tashqi ishlar vaziri Andrey Sibixa o‘z lavozimini saqlab qolishi kutilmoqda.

Agar parlament deputatlari prezident taqdim etgan nomzodni qo‘llab-quvvatlasa, Sergey Koretskiy Ukraina hukumatiga rasman rahbarlik qilishni boshlaydi va mamlakatning yangilangan vazirlar mahkamasi ishga kirishadi.