Latviya bilan birga O‘zbekistonda tibbiyot muhandisligi bo‘yicha yangi magistratura yo‘nalishi tashkil etiladi

Tomonlar O‘zbekistonda tibbiy va texnik mutaxassislar tayyorlash sohasida RTUning Biotibbiyot muhandisligi va nanotexnologiya instituti bilan amaliy hamkorlik istiqbollarini muhokama qildi.

RTU O‘zbekistonda Yevropa Ittifoqining ilg‘or tajribalari asosida yaratilgan va jahon bozori talablariga javob beradigan innovatsion o‘quv dasturlari asosida tibbiyot muhandisligi yo‘nalishi bo‘yicha mutaxassislar tayyorlash loyihasini amalga oshirish uchun 9 ta universitetdan iborat konsorsiumga qo‘shildi.

Loyihaning qiymati taxminan 0,51 million dollarni tashkil etadi. Moliyaviy manba - Ta’lim va madaniyat bo‘yicha Yevropa ijrochi agentligi. Amalga oshirish muddati 2023-2025 yillar.

Loyihada quyidagilar amalga oshiriladi:

- yuqori texnologiyali tibbiy asbob-uskunalar va texnologiyalardan foydalanish va boshqarish bo‘yicha talabga javob beradigan mutaxassislarni tayyorlash maqsadida tibbiyot muhandisligi bo‘yicha magistrlik dasturini O‘zbekiston ta’lim tizimiga joriy etish;

- magistrlar uchun 12 ta yangi ixtisoslashtirilgan treninglar o‘tkazish;

- 4 ta yangi o‘quv treninglari o‘tkazish;

- ommaviy ochiq onlayn treninglarga asoslangan 1 ta veb-platformada (Massive Open Online Courses-MOOCS) o‘quv materiallarini joylashtirish;

- 7 ta talaba laboratoriyasini (universitetlar qoshida) tashkil etish;

- 3 ta hududiy malaka oshirish markazlarini (Andijon, Buxoro va Toshkent shaharlarida) yaratish;

- Tibbiyot muhandislari jamiyatini tashkil etish.

Har yili 80 nafar magistrlar yangi dastur bo‘yicha tahsil oladi, o‘quv markazlarida 200 dan ortiq texnik mutaxassis (shu jumladan ishsizlar) tayyorlanib, malakasini oshiradi.

Dastur texnik ma’lumotga ega bo‘lgan bakalavrlarga ham, asosiy tibbiy ma’lumotga ega bo‘lganlarga ham mo‘ljallangan.