Nigerdagi harbiy xunta xalqaro tashkilotlar faoliyatini taqiqladi

Nigerda hokimiyatni egallab olgan harbiy xunta barcha xalqaro tashkilotlarning jangovar hududlardagi faoliyatini taqiqladi, deb xabar berdi AFP axborot agentligi 1 sentabr, juma kuni. Taqiq «hozirgi xavfsizlik holati» tufayli joriy etildi», deyiladi mamlakat Ichki ishlar vazirligi bayonotida. Cheklovlar milliy nodavlat tashkilotlar (NNT), xalqaro tashkilotlar va Birlashgan Millatlar Tashkiloti (BMT) agentliklari faoliyatiga taalluqlidir. Taqiq qaysi hududlarda qo‘llanilishini Niger rasmiylari aniqlashtirmadi.

Nigerdagi harbiy to‘ntarishdan so‘ng bir qancha mamlakatlar G‘arbiy Afrika davlatiga yordam berishni va rasmiy ikki tomonlama hamkorlikni to‘xtatdi, deya qayd etadi AFP. BMT tashkilotlari Nigerga insonparvarlik yordamini ko‘rsatishda davom etmoqda. 

BMT Nigerda humanitar koridor yaratishga chaqirmoqda 

Birlashgan Millatlar Tashkilotining Xalqaro migratsiya tashkiloti (XMT) Nigerda mamlakatda qolib ketgan xorijlik muhojirlarni qaytarish uchun zudlik bilan humanitar koridor tashkil etishga chaqirdi. BMT ma’lumotlariga ko‘ra, Nigerda 710 mingdan ortiq qochqin va ichki ko‘chirilganlar bor. 

«XMT rasmiylar Nigerda qolib ketgan zaif muhojirlarning o‘z mamlakatlariga xavfsiz, munosib va ixtiyoriy ravishda qaytishini ta’minlaydigan humanitar koridor yaratishini qat’iy qo‘llab-quvvatlaydi», dedi XMT mintaqaviy direktori Kristofer Gaskon. 

YeI harbiy xuntaga qarshi sanksiyalarni muhokama qilmoqda 

Yevropa Ittifoqi Nigerda hokimiyatni egallab olgan harbiy xunta yetakchilariga qarshi sanksiyalar joriy qilmoqchi. Yevropa Ittifoqi tashqi ishlar va xavfsizlik siyosati bo‘yicha oliy vakili Jozep Borrel Yevropa Ittifoqiga a’zo davlatlar tashqi ishlar vazirlari yig‘ilishidan so‘ng: «Biz isyonchilarga qarshi individual sanksiyalar uchun qonuniy asos yaratishga qaror qildik», dedi. 

«Sanksiyalar xuntaga qarshi qaratilgan bo‘ladi» deya ta’kidlab o‘tdi Borrel hamda Niger aholisiga bevosita ta’sir qilmaydigan har qanday hamkorlik to‘xtatilishini qo‘shimcha qildi. Cheklovlar masalasida Yevropa Ittifoqi G‘arbiy Afrika davlatlari iqtisodiy hamjamiyatining (EKOVAS) qarorlariga tayanmoqchi.

Politico nashrining xabar berishicha, EKOVAS tashkiloti Borrelga Nigerdagi harbiy to‘ntarish yetakchilariga qarshi sanksiyalar qo‘llashni so‘rab maktub yo‘llagan. 

Nigerdagi harbiy to‘ntarish 

Bu yil iyul oyi oxirida isyonchilar Nigerda hokimiyatni qo‘lga oldi. Davlat to‘ntarishidan keyin mamlakat a’zoligini to‘xtatgan EKOVAS va bir qator G‘arb davlatlari isyonchilarni hokimiyatni demokratik yo‘l bilan saylangan prezident Muhammad Bazumga qaytarishga chaqirdi. Shu bilan birga, EKOVAS a’zosi bo‘lgan davlatlar xunta buni rad etgan taqdirda, harbiy aralashuv bilan tahdid qildi.