15 ta faktni tasdiqlovchi ma’lumotlarni talab etish bekor qilinadi 

«Davlat xizmatlari ko‘rsatish tizimi takomillashtirilganligi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida»gi qonun loyihasi bilan davlat xizmatlari ko‘rsatish tizimini takomillashtirish ko‘zda tutilmoqda. 

Jumladan, loyihada diplom, litsenziya, ruxsatnoma, davlat boji, yig‘imlar va boshqa to‘lovlar to‘langanini tasdiqlovchi hujjatlar kabi 15 ta faktni tasdiqlovchi ma’lumotlar va hujjatlar talab etishni bekor qilish belgilanmoqda. 

Qonun loyihasi Oliy Majlis Qonunchilik palatasidagi Ekologik partiya fraksiyasi yig‘ilishida muhokama qilindi. 

— Fuqarolar va tadbirkorlarga davlat xizmatlarini ko‘rsatish tizimini yengillashtirish, ortiqcha byurokratik to‘siqlarni bartaraf etish hamda davlat xizmatlarini ko‘rsatish sifatini yaxshilash borasida qator ishlar amalga oshirilmoqda, — dedi fraksiya a’zosi Nosirjon Aminov. — Bu yo‘nalishdagi chora-tadbirlar natijasida elektron tizim orqali olish imkoniyati mavjud bo‘lgan ma’lumotlarni qog‘oz ko‘rinishida so‘rash, ishni tashkil etish uchun muhim bo‘lmagan hujjatlarni talab etish bekor qilindi. 

Qonun loyihasida nazarda tutilayotgan tartiblar davlat xizmatlarini ko‘rsatganlik uchun undiriladigan to‘lov miqdorlarini kamaytirish hamda davlat xizmatlarini ko‘rsatish muddatlarini qisqartirishga xizmat qilishi ta’kidlanmoqda. 

Yig‘ilishda deputatlar mazkur qonun loyihasini yanada takomillashtirish yuzasidan bir qator taklif va fikr-mulohazalarni bildirdi.