“Ўзбекистон–2030” стратегияси лойиҳасида аҳолига қулай ва тезкор давлат хизматларини ташкил этиш, жараёнларни тўлиқ рақамлаштириш ва ортиқча ҳужжатбозликни қисқартиришга қаратилган комплекс чора-тадбирлар белгиланган.
Лойиҳада келтирилишича, 370-банд доирасида Ўзбекистоннинг БМТнинг Электрон ҳукуматни ривожлантириш рейтингида “Топ-30” таликка киришига эришиш мақсад қилинган. Шунингдек, 371-бандга мувофиқ, электрон шаклда кўрсатиладиган давлат хизматлари улушини 90 фоиздан ошириш режалаштирилмоқда.
Фуқаролар мурожаатлари ва назорат механизмларини кучайтириш мақсадида 372-бандда “Халқ назорати” портали ҳар бир ҳудудда 100 фоиз жорий этилиши кўзда тутилган. Бундан ташқари, 373-банд бўйича фақат Ягона интерактив давлат хизматлари портали орқали кўрсатиладиган хизматлар улушини 50 фоизгача етказиш вазифаси қўйилган.
Давлат хизматларини янги форматда тақдим этишга оид мақсадлар ҳам белгиланган. Жумладан, 374-бандда композит ва проактив тарзда кўрсатиладиган давлат хизматлари сонини камида 400 тага етказиш режалаштирилган.
Рақамлаштириш йўналишида 375-бандга кўра, мавжуд 40 миллион ҳужжатдан 25 миллионини рақамлаштириш вазифаси белгиланган. Шу билан бирга, 376-банд доирасида “Рақамли ҳукумат” тизимининг ягона платформасига уланган сервислар сонини 700 тага етказиш, ҳужжатлар ва муносабатларнинг рақамли шаклда бўлишини таъминлаш назарда тутилмоқда.
Хизматлар сифати ва тезкорлигини ошириш мақсадида 377-бандда 100 тадан ортиқ давлат хизматини кўрсатиш муддатларини 50 фоизга қисқартириш кўзда тутилган. Бунга қўшимча равишда, 378-бандда 500 тага яқин давлат хизматларини кўрсатиш тартиб-таомилларини соддалаштириш режалаштирилган.
Шунингдек, 379-бандга мувофиқ давлат хизматларининг 40 фоизини хусусий секторга ўтказиш мақсад қилинган. Архив соҳасидаги хизматларни кенгайтириш бўйича эса 380-бандда архив соҳасида давлат хизматлари сонини 14 тага етказиш вазифаси белгиланган.
