Tadbirkorlar reytingi, “oila sudyalari” va maishiy texnika importida yangi talab - 1 fevraldan nimalar o‘zgaradi?

Kun.uz sayti o‘z an’anasiga muvofiq, 2024 yil 1 fevraldan boshlab O‘zbekiston qonunchiligida ro‘y beradigan ayrim o‘zgarishlarni eslatib o‘tadi.

Maishiy texnikalar importida talab

Prezidentning “Elektrotexnika sanoatining ishlab chiqarish va eksport salohiyatini yanada oshirishga doir qo‘shimcha chora-tadbirlar to‘g‘risida”ga qaroriga asosan 2024 yil 1 fevraldan boshlab maishiy texnikalar importida ishlab chiqaruvchining rasmiy dileri bo‘lishi talab etiladi.

Qaror bilan O‘zbekistonga olib kirishda sifati, xavfsizligi va servis kafolatini ta’minlaydigan ishlab chiqaruvchining vakolatli vakili yoki rasmiy dilerlari mavjud bo‘lishi talab qilinadigan mahsulotlar ro‘yxati ham tasdiqlangan. Ro‘yxatga quyidagilarga kiritilgan:

– alyumin radiator;

– suv isitish qozoni;

– suv isitkich;

– bug‘ qozoni;

– changyutkich;

– kir yuvish mashinasi;

– sovitkich, muzlatkich;

– televizor, monitor;

– maishiy gaz pechi;

– duxovka, pechka;

– mikroto‘lqinli pech,

– dazmol;

– suv qaynatkich;

– konditsioner;

– suv nasosi.

Kasanachilar uchun o‘quv kurslari

2023 yil 21 dekabr kuni prezidentning “Oilalarni mustahkamlash va xotin-qizlar faolligini oshirish bo‘yicha qo‘shimcha chora-tadbirlar to‘g‘risida”gi qarori qabul qilingandi.

Hujjatga ko‘ra, 2024 yil 1 fevraldan boshlab kasanachilik va hunarmandchilik yo‘nalishida yangi ish boshlayotgan xotin-qizlar uchun tadbirkorlik faoliyatini yo‘lga qo‘yish, rivojlantirish, takomillashtirish hamda ularga uslubiy yordam berish maqsadida ta’lim tashkilotlarida tajribali kasanachi va hunarmandlarni jalb etgan holda kasb-hunarga o‘qitish kurslari tashkil etiladi. Xotin-qizlarni kasanachilik va hunarmandchilik yo‘nalishlarida kasb-hunarga o‘qitish bilan bog‘liq xarajatlar Oila va xotin-qizlarni qo‘llab-quvvatlash davlat maqsadli jamg‘armasi mablag‘lari hisobidan tasdiqlangan xarajatlar smetasi doirasida moliyalashtiriladi.

Bunda, ta’lim tashkilotlarida kasb-hunarga o‘qitilgan har bir bitiruvchi xotin-qiz uchun sarflangan o‘qitish xarajatlarining 70 foizi, biroq bazaviy hisoblash miqdorining 5 barobaridan oshmagan qismi davlat tomonidan qoplab beriladi.

Qaror bilan 1 fevraldan tajriba tariqasida fuqarolik ishlari bo‘yicha Samarqand shahar, Namangan tumanlararo va Mirzo Ulug‘bek tumanlararo sudlarining 2 nafardan sudyasini oilaviy nizolarni ko‘rish bo‘yicha ixtisoslashtirgan holda ushbu sudlarda “Oila sudyalari” tashkil etish ham ko‘zda tutilgan.

Tadbirkorlar reytingi joriy etiladi

Prezidentning tegishli qarori bilan 2024 yil 1 fevraldan qonunchilik talablariga rioya etgan holda faoliyat yuritayotgan tadbirkorlarni aniqlash va qo‘shimcha rag‘batlantirishni nazarda tutuvchi tadbirkorlik sub’yektlari barqarorlik reytingi joriy etiladi.

Reyting doirasida tadbirkorlar quyidagi toifalarga ajratiladi:

AAA, AA va A toifalar – yuqori barqarorlik reytingi;

VVV, VV va V toifalar – o‘rta barqarorlik reytingi;

SSS, SS va S toifalar – qoniqarli barqarorlik reytingi;

D toifa – quyi barqarorlik reytingi.

Reyting Soliq qo‘mitasining “Tadbirkorlarning barqarorlik reytingi” elektron platformasida idoralararo axborot almashinuvi vositasida avtomatik tarzda (onlayn) shakllantiriladi va Savdo-sanoat palatasining rasmiy veb-saytida e’lon qilib boriladi.

Yuqori barqarorlik reytingidagi tadbirkorlar har yili 20 avgust – Tadbirkorlar kuni arafasida taqdirlash uchun davlat mukofotlari hamda “Faol tadbirkor” ko‘krak nishoniga tavsiya etiladi.

 Boshqa o‘zgarishlar

2024 yil 1 fevraldan boshlab:

• reyestrga kiritilgan yolg‘iz keksalar va nogironligi bo‘lgan shaxslarga davlat tomonidan kafolatlangan ijtimoiy xizmatlar va yordam ijtimoiy xizmat ko‘rsatish shartnomasi asosida ko‘rsatiladi;
• Kambag‘allikni qisqartirish va bandlik vazirligi har oyning 15-sanasiga qadar yaratilgan yangi ish o‘rinlari va bandligi ta’minlangan aholi to‘g‘risidagi ma’lumotlarni idoralararo elektron axborot almashinuvi orqali Soliq qo‘mitasiga taqdim etadi;
• Davlat budjeti mablag‘lari hisobidan amalga oshiriladigan ichimlik va oqova suv yo‘nalishidagi loyihalar doirasida qurilish materiallari, uskuna va jihozlar faqat mahalliy ishlab chiqaruvchilardan xarid qilinadi.