O‘zbekiston va Shvetsiya chiqindilarni boshqarish sohasida hamkorlik qiladi

Stokholm shahrida O‘zbekiston va Shvetsiya o‘rtasida atrof-muhitni muhofaza qilish sohasidagi hamkorlik istiqbollari muhokama qilindi.

Foto: «Dunyo» AA

O‘zbekiston elchisi Nodir G‘aniyev Shvetsiya Atrof-muhitni o‘rganish instituti Xalqaro biznes departamenti rahbari Jina Xedbring va ushbu tashkilot loyiha menejyeri Simona Andersson bilan uchrashuv o‘tkazdi, deb xabar bermoqda "Dunyo".

Muzokaralar jarayonida Shvetsiya Atrof-muhitni o‘rganish instituti tomonidan dunyoning qator mamlakatlarida bio xilma-xillik, atrof-muhit, iqlim o‘zgarishi, raqamlashtirish, energiya, o‘rmonchilik, suv va chiqindilarni boshqarish hamda boshqa ko‘plab yo‘nalishlarda olib borilayotgan tadqiqotlar va amalga oshirilayotgan loyihalar to‘g‘risida taqdimot qilindi.

O‘zbekiston va Shvetsiya o‘rtasida ekologiya va atrof-muhitni himoya qilish, shuningdek, suv resurslari va chiqindilarni boshqarish sohasida hamkorlik istiqbollari yuzasidan fikr almashildi.

Uchrashuv yakunida elchixona va Shvetsiya Atrof-muhitni o‘rganish instituti o‘rtasida muntazam aloqalarni davom ettirish hamda ikki tomon uchun manfaatli bo‘lgan yo‘nalishlarda hamkorlik qilish bo‘yicha kelishuvga erishildi.