Xalq demokratik partiyasining XIV qurultoyi bo‘lib o‘tdi

Qurultoyda Oliy Majlis Qonunchilik palatasi va xalq deputatlari mahalliy Kengashlariga bo‘lib o‘tadigan saylovlar munosabati bilan O‘zbekiston Xalq demokratik partiyasining 2025-2029 yillarga mo‘ljallangan yangi saylovoldi dasturi delegatlar e’tiboriga taqdim etildi.

Dasturda davlat va jamiyatni rivojlantirish, Qonun ustuvorligini ta’minlash va kuchli ijtimoiy himoya siyosatini yuritishga qaratilgan 10 ta yo‘nalishda, 15 qadamni o‘zida mujassam etgan 100 ga yaqin taklif va tashabbuslar ilgari surilayotganligi ma’lum qilindi.

Xususan, dasturning ijtimoiy sohani rivojlantirish bo‘yicha adolatli davlat pensiya ta’minoti tizimini joriy qilish, aholida dori-darmon vositalariga qaramlikni kamaytirish, maktablarda chet tillari va IT yo‘nalishdagi o‘quv soatlarini keskin ko‘paytirish, o‘zini-o‘zi band qilgan shaxslar uchun shart-sharoitlarni yaxshilash, ulush kiritish asosida uy-joy qurilayotganda xaridorlarni kafolatli himoya qilish bo‘yicha yechimlar taklif etilgan.

Qurultoyda partiyaning Oliy Majlis Qonunchilik palatasi deputatligiga saylov uchun tashkil etilgan bir mandatlik okrugdan 75 nafar nomzodi ilgari surildi hamda proporsional tizim bo‘yicha 100 kishilik partiyaviy ro‘yxati ham taqdim etildi.

Nomzodlarning 47,4 foizi ayollardan iborat bo‘lib, barcha 175 nafar nomzod oliy ma’lumotga ega, ularning 8 foizini huquqshunoslar, 13 foizi iqtisodchi, 6 foizi muhandis, 9 foizini tibbiyot, 31,4 foizini pedagoglar, 32,6 foizini boshqa soha vakillari tashkil etadi. Shuningdek, nomzodlarning 18 nafarida fan nomzodi (PhD) va 15 nafarida fan doktori (DSc) ilmiy darajasi mavjud.