Mers Yevropada Ukraina bo‘yicha aloqa guruhini tuzishga chaqirdi

Xristian-demokratik ittifoq (XDI) va Xristian-sotsial ittifoq (XSI) muxolifat blokidan Germaniya kansleri lavozimiga nomzod Fridrix Mers AQShda bo‘lajak hokimiyat almashishi munosabati bilan Ukrainaga keyingi yordamni muvofiqlashtirish uchun Yevropa aloqa guruhini shakllantirishni taklif qildi. «Biz Ukraina hech qanday cheklovlarsiz o‘zini himoya qilish huquqidan foydalanishi uchun hamma narsani qilishimiz kerak», dedi u 9 dekabr, dushanba kuni Kiyevda Ukraina prezidenti Volodimir Zelenskiy bilan uchrashuvda.

Bundan tashqari, yevropaliklar Ukrainadagi urush imkon qadar tezroq tugashi uchun hamma narsani qilishi kerak, deb ta’kidladi Bundestagdagi XDI/XSI fraksiyasi rahbari. Uning so‘zlariga ko‘ra, AQShda Donald Trampning hokimiyat tepasiga kelishiga tayyorgarlik ko‘rish va barcha ehtimoliy ssenariylarni o‘ylab ko‘rish kerak.

Mers fikricha, Yevropaga Germaniya, Fransiya yoki Britaniyaning bir o‘zi ishlab chiqa olmaydigan strategiya kerak. «Biz bu strategiyani faqat birgalikda ishlab chiqishimiz mumkin», deya qo‘shimcha qildi u. Mers, shuningdek, Zelenskiyning Daniya bunday aloqa guruhida muhim rol o‘ynashi mumkinligi haqidagi taklifini «katta qiziqish bilan» qabul qilganini aytdi.

Zelenskiy uzoq masofali qurollar yetkazilishiga umid bildirdi

O‘z navbatida, Volodimir Zelenskiy Germaniyaga «umuman Germaniya hukumati va parlament a’zolari, urush boshidanoq ukrainaliklarni qabul qilgan xalq tomonidan ko‘rsatilgan yordam uchun» minnatdorchilik bildirdi. Shu bilan birga, u Germaniyaning uzoq masofali qurollari yetkazib berilishiga umid bildirdi. «O‘ylaymanki, geosiyosat, NATO bo‘yicha biz haqiqatan ham sizning pozitsiyangizni eshitishni istaymiz», — dedi davlat rahbari.

Bunga javoban Mers Zelenskiy TAURUS nemis qanotli raketalarini yetkazib berish masalasidagi pozitsiyasidan xabardor ekanligini aytdi. «Unda hech narsa o‘zgarmadi», deb ishontirdi siyosatchi. U agar Germaniyada xristian demokratlar hokimiyatga kelsa, Ukrainaga bunday qurollar berilishini istisno qilmadi.

Zelenskiy, shuningdek, yaqin orada AQSh prezidenti Jo Baydenga qo‘ng‘iroq qilib, Ukrainani NATOga taklif qilish masalasini ko‘tarmoqchi ekanligini aytdi. Tramp bilan bu haqda gaplashish hozircha qiyin, chunki u hali prezidentlik lavozimini egallamagan, deya tushuntirdi u. «Prezident Tramp bilan u hali Oq uyda bo‘lmagani uchun unga bog‘liq bo‘lmagan narsani muhokama qilishdan ma’no yo‘q», dedi Zelenskiy.