Chirchiqda 4 yoshli qizining o‘limida gumonlanayotgan ayol qamoqqa olindi

Toshkent viloyatining Chirchiq shahrida 4 yoshli qizini urib, o‘limiga sabab bo‘lgan tan jarohati yetkazganlikda gumonlanayotgan ona qamoqqa olindi. Bu haqda viloyat IIB matbuot kotibi Bobur To‘laganov xabar berdi.

Qayd qilinishicha, 1977 yilda tug‘ilgan ayolga nisbatan qamoqqa olish tarzidagi ehtiyot chorasi qo‘llangan. Jinoyat ishi doirasida tergov harakatlari olib borilmoqda.

2024 yil 23 dekabr kuni Toshkent viloyati, Bo‘stonliq tuman tibbiyot birlashmasiga 2020 yilda tug‘ilgan qiz tanasidagi turli jarohatlar bilan qabul qilingani haqida xabar berildi.

Tergovga qadar tekshiruvda 1977 yilda tug‘ilgan ayol 4 yoshli qizini qattiq kaltaklab, tan jarohati yetkazgani aniqlangan. Xususan, tibbiyot xulosasiga ko‘ra, bolada bosh miya yopiq jarohati, bosh miya lat yeyishi og‘ir darajasi va bosh sohasidagi boshqa og‘ir jarohatlar qayd etilgan.

27 dekabr kuni holat yuzasidan Toshkent viloyati Chirchiq shahar IIB tomonidan Jinoyat kodeksining 126-1-moddasi 7-qismi «b» bandi (Oilaviy maishiy zo‘ravonlik) bilan jinoyat ishi qo‘zg‘atilgan edi.

Qiz 7 yanvar kuni vafot etdi.

Tergov vaqtida jinoyat natijasidagi oqibat o‘zgargani, ya’ni jabrlanuvchining o‘limi jinoyatga huquqiy baho berish jarayoniga ta’sir qilgan — ayblov og‘irroq jazoni ko‘zda tutuvchi qismga qayta malakalangan.