Jammu va Kashmirda strategik muhim tunnel foydalanishga topshirildi

Hindiston bosh vaziri Narendra Modi Jammu va Kashmirda qurilgan yangi tunnelning ochilishiga tashrif buyurdi, deb xabar beradi NDTV. Ushbu tunnel mintaqani avtotransportlar harakati uchun qulayroq qilishi kutilmoqda.

Tunnelning qiymati 313 million dollarni tashkil etgan. Uzunligi 6,5 kilometrga yetadigan tunnel Shrinagar-Leh shossesida joylashgan. Qurilish ishlari 2015 yilda boshlangan edi. Tunnel Xitoy bilan chegara yaqinida joylashgan Ladakha mintaqasining mudofaa ehtiyojlari nuqtai nazaridan muhim ahamiyatga ega. U, shuningdek, Jammu va Kashmirni mamlakatning boshqa hududlari bilan bog‘lab turadi.

Loyihani nazorat qilgan Avtomagistrallar va infratuzilmalarni rivojlantirish milliy korporatsiyasi ushbu tunnelni «muhandislik mo‘jizasi» deb atagan. Ochilish marosimida xavfsizlik choralari kuchaytirilgan: hududga politsiya va harbiylar joylashtirilgan, shuningdek, muhim chorrahalarga bir nechta nazorat-o‘tkazish punktlari o‘rnatilgan.

2020 yil iyunda tog‘li Sharqiy Ladakha hududida Xitoy va Hindiston harbiylari o‘rtasida to‘qnashuv sodir bo‘lgandi. O‘shanda 20 nafar hind harbiysi halok bo‘lgan, natijada ikki mamlakat o‘rtasidagi munosabatlar keskinlashgan.

Avvalroq Kashmirdagi yangi temiryo‘l ko‘prigi Hindistondagi vaziyatni o‘zgartirishi mumkinligi to‘g‘risida xabar berilgandi. Hind temiryo‘llariga Jammu shtatidagi Chenab daryosi ustidan o‘tgan ushbu ko‘prik qurilishini yakunlashga 20 yil kerak bo‘lgan.