Yevrokomissiya G‘azoga yordam uchun qo‘shimcha 120 mln yevro ajratishga va’da berdi

Yevropa Ittifoqi Isroil va HAMAS o‘rtasidagi sulhni olqishlab, G‘azo sektori uchun 120 million yevro gumanitar yordam ajratishga va’da berdi. Bryusselga ko‘ra, shu orqali YeI tomonidan 2023 yildan beri falastinliklarga ko‘rsatilayotgan yordamning umumiy miqdori 450 million yevroga yetadi.

«O‘t ochishni to‘xtatish va garovga olinganlarni ozod qilish bo‘yicha bitim mintaqa uchun juda zarur bo‘lgan umidni beradi. Ammo G‘azo sektoridagi gumanitar vaziyat hamon qayg‘uli. Yevropa falastinliklarni qo‘llab-quvvatlashni davom ettirish uchun 2025 yilda turli yordamlar bilan bir qatorda 120 million yevro ham yo‘naltiradi», — deydi YeK raisi Ursula fon der Lyayen.

Yangi paket oziq-ovqat va tibbiy yordam, suv ta’minoti, sanitariya va gigiyena, shuningdek, ko‘chirilganlar xavfsiz yashashi uchun ularni uy-joy bilan ta’minlashga mo‘ljallangan.

Aholining zaif qatlamiga yordam taqdim etishda YeI BMT agentliklar va gumanitar tashkilotlar bilan yaqindan hamkorlik qiladi.

Avvalroq Isroil Falastinning HAMAS harakatini G‘azo sektorida o‘t ochishni to‘xtatish bo‘yicha kelishuv loyihasining bir necha bandini o‘zgartirishga urinayotganlikda ayblagandi. Falastin harakati esa erishilgan kelishuvga sodiqligini e’lon qilgan.