Isroil G‘azo sektori va G‘arbiy sohilda 16 nafar falastinlikni o‘ldirdi

15 mart kuni Isroil havo hujumi uyushtirib, G‘azo sektorining markaziy qismidagi Zavayda shahri kiraverishida politsiya avtomobiliga zarba berdi. Oqibatda yuqori martabali politsiya mulozimi va yana sakkiz nafar ofitser halok bo‘ldi. G‘azo sog‘liqni saqlash vazirligi ma’lumotlariga ko‘ra, kamida 14 kishi, asosan yo‘lovchilar yaralangan.

Yakshanba kuni erta tongda esa Isroilning boshqa havo hujumida G‘azo sektorining markaziy qismi – Nusayratning g‘arbiy hududiga zarba berilgan. Oqibatda uch kishi: erkak, uning homilador rafiqasi va ularning o‘g‘li halok bo‘lgan.

Isroil harbiylari bir kun avval Hamas a’zolari o‘z qo‘shinlariga qarata o‘t ochgan hodisaga javoban yakshanba kuni G‘azoda zarba berganini ma’lum qildi. Ular bu zarba – politsiya ofitserlari o‘limiga olib kelganimi yoki Nusayratdagi oilaning o‘limiga sabab bo‘lgan hujummi, aniqlik kiritmadi.

G‘arbiy sohilda esa Isroil kuchlari bir oilaning 4 a’zosi – ota, ona va ularning ikki farzandini avtomobilda ketayotgan vaqtida otib o‘ldirdi.

Falastin rasmiylariga ko‘ra, G‘arbiy sohilning Tammun qishlog‘ida 37 yoshli Ali Xolid Bani Odeh, uning 35 yoshli rafiqasi Vaad va ularning besh hamda yetti yoshli ikki o‘g‘li boshidan o‘q yeb halok bo‘lgan.

Avtomobilda bo‘lgan va o‘z oilasi o‘limiga guvoh bo‘lgan 8 va 11 yoshli ikki nafar katta yoshli bolalar esa o‘q parchalaridan olingan yengil jarohatlar bilan tirik qolgan.

Falastin Qizil yarim oy jamiyati o‘z bayonotida Isroil kuchlari dastlab tibbiyot xodimlarining avtomobil ichidagi yaradorlarga yetib borishiga to‘sqinlik qilganini va ularga hududni tark etishni buyurganini ma’lum qildi.

Omon qolgan ikki o‘g‘ildan biri — 12 yoshli Xolid shifoxonada Reuters agentligiga «mashina o‘qqa tutilishidan oldin onasining yig‘layotganini va otasining duo qilayotganini eshitganini» aytdi. «Biz to‘g‘ridan to‘g‘ri o‘qqa tutilganimizda manbasini bilmadik. Akam Mustafo va mendan tashqari mashinadagilarning hammasi halok bo‘ldi», dedi bola. U askarlar uni mashinadan sudrab chiqarib kaltaklaganini ham qo‘shimcha qilgan.

Isroil harbiylari va chegara politsiyasi o‘sha vaqtda shaharchada qo‘shma operatsiya o‘tkazayotganini bildirdi. Ularning da’vo qilishicha, avtomobil Isroil kuchlari tomon tezlikni oshirib kelgan.

«Operatsiya davomida bir avtomobil kuchlar tomon tezlikni oshirdi, ular buni o‘z xavfsizligiga bevosita tahdid deb qabul qildi va o‘t ochish bilan javob qaytardi. Natijada avtomobil ichida bo‘lgan to‘rt nafar falastinlik halok bo‘ldi», – deyiladi harbiylar bayonotida. Xabarda aytilishicha, hodisa tafsilotlari o‘rganilmoqda.

Shu bilan dam olish kunida G‘arbiy sohil va G‘azoda Isroil hujumlarining aniqlangan qurbonlari soni 16 nafarga yetdi. Bundan tashqari, Falastin idoralari dushanbaga o‘tar kechasi Isroil ko‘chmanchilarining hujumi oqibatida yana bir falastinlik o‘ldirilganini ma’lum qildi.

Zo‘ravonliklar to‘xtamayapti

G‘azoda 2025 yil oktyabr oyida Isroil-Hamas o‘t ochishni to‘xtatish bo‘yicha AQSh boshchiligida kelishuvga erishgandi. Shunga qaramay, Falastin bo‘ylab muntazam ravishda zo‘ravonliklar sodir bo‘lmoqda.

Aholi, shifokorlar va tahlilchilar fikriga ko‘ra, 28 fevralda AQSh va Isroil Eronga hujum boshlaganidan keyingi kunlarda G‘azodagi Isroil hujumlari kamaygan. Ammo so‘nggi kunlarda ular yana ko‘paya boshlagan: Eronda urush boshlanganidan beri Isroil o‘qlaridan kamida 36 falastinlik halok bo‘lgan.

Hudud sog‘liqni saqlash vazirligi oktyabr oyidagi sulhdan beri kamida 670 kishi Isroil o‘qlaridan halok bo‘lganini aytmoqda. Isroil esa shu davr mobaynida G‘azoda to‘rt nafar askari o‘ldirilganini bildirdi.

BBC nashrining BMT ma’lumotlariga tayanib yozishicha, G‘arbiy sohilda ham G‘azodagi urushdan keyin zo‘ravonlik holatlari keskin oshgan. Xususan, BMTning Gumanitar masalalarni muvofiqlashtirish boshqarmasi hisobotiga ko‘ra, 2023 yil 7 oktyabrdan 2026 yil 8 martgacha bo‘lgan davrda bosib olingan G‘arbiy sohilda 1064 nafar falastinlik o‘ldirilgan, ularning kamida 231 nafari bolalardir.

Bundan tashqari, 28 fevralda AQSh, Isroil va Eron o‘rtasida urush boshlanganidan beri ishg‘ol ostidagi G‘arbiy sohilning katta qismida harakatlanish bo‘yicha qat’iy cheklovlar saqlanib qolmoqda.