Rossiyada 5 fevraldan noqonuniy migrantlarni mamlakatdan chiqarib yuborish rejimi boshlanadi

Rossiya Davlat dumasi raisi Vyacheslav Volodin 5 fevraldan migratsiya siyosatini takomillashtirish bilan bog‘liq navbatdagi o‘zgarishlar kuchga kirishini ma’lum qildi.

«Noqonuniy migrantlarni chiqarib yuborish rejimini nazarda tutuvchi qonun kuchga kiradi. Rossiya Federatsiyasi qonunchiligiga rioya qilmaydigan yoki qolish huquqini qo‘ldan chiqarganlar mamlakatimizda bo‘lmasligi kerak. Ushbu chora xavfsizlikni kuchaytirishga qaratilgan», — deb yozadi Volodin o‘zining Telegram-kanalida.

Bundan tashqari, mamlakatga kirish yoki undan chiqish qoidalarini buzganlik, shuningdek, nazorat qilinadigan shaxslar reyestriga kiritilgan migrantga ko‘rsatilishi taqiqlangan xizmatlar ko‘rsatganlik uchun ma’muriy javobgarlik joriy etiladi.

Volodinning aniqlik kiritishicha, tegishli qonun 5 fevraldan kuchga kiradi.

Avvalroq Rossiya Ta’lim vazirligi maktabga qabul qilinish vaqtida rus tilini bilish bo‘yicha testni topshira olmagan farzandining qo‘shimcha o‘qishi uchun sharoit yaratmagan migrantlarni ma’muriy javobgarlikka tortish taklifini bergandi.

2024 yilda «Migrant Servis» tahlilchilariga ko‘ra, Rossiyani 1 millionga yaqin migrant, asosan, O‘zbekiston, Tojikiston va Qirg‘iziston kabi davlatlar fuqarolari tark etgan. 2025 yilda bu tendensiya davom etishi va farazga ko‘ra yana 1 millionga yaqin mehnat migranti xorijda yanada jozibador mehnat sharoitlarini izlab Rossiyani tark etishi mumkin.