Shimoliy Irlandiyada migrantlarga qarshi namoyishlar o‘tkazildi

Shimoliy Irlandiya poytaxti Belfast shahrida ommaviy tartibsizliklar bo‘lib o‘tdi – bunga Sudandan kelgan muhojir mahalliy aholi vakiliga qilgan hujum sabab bo‘ldi. Ijtimoiy tarmoqlarda tarqalgan videoda pichoq bilan qurollangan qora tanli shaxs o‘z qurboni ustiga chiqib olib, uni so‘yib tashlash bilan tahdid qilayotgani aks etgan. Buyuk Britaniya bosh vaziri Kir Starmer buni «dahshatga soluvchi» hujum deb atadi.

Hujum qilgan shaxs – 30 yoshli Hodi Alodid – qo‘lga olingan, chorshanba kuni sud unga qotillikka urinish, tibbiyot xodimiga o‘lim bilan tahdid qilish va jamoat joyida pichoq olib yurish bo‘yicha ayblov qo‘ydi. Alodid – Sudandan bo‘lib, 2023 yil fevralida avvaliga Parijdan Dublinga uchgan, keyin esa Irlandiya bilan chegara orqali Shimoliy Irlandiyaga kirib kelgan. U siyosiy boshpana so‘ragan va Buyuk Britaniyada 2028 yilgacha qolishga ruxsat olgan.

Jabrlanuvchi – 40 yoshli Stiven Ogilvi – yuzi, bo‘yni va yelkasidagi jarohatlar bilan shifoxonada og‘ir ahvolda qolmoqda. Sud majlisida u chap ko‘zidan ayrilgani ma’lum qilindi.

Britaniya nashrlari yozishicha, hujum qilgan va hujumga uchragan qo‘shnilar bo‘lishgan. Alodidning motivlari hozircha ma’lum emas.

Sudda Alodid tarjimon orqali savollarga javob qaytardi. U o‘ziga qo‘yilgan ayblov yuzasidan e’tiroz bildirmagan. Ish bo‘yicha keyingi sud majlisi 8 iyulga belgilangan, ungacha Alodid hibsda qoladi, sud uning garov evaziga ozodlikka chiqish imkoniyatini istisno qilgan.

Hujum vaqti olingan video ijtimoiy tarmoqlarda keng tarqalgach, o‘ng aktivist Tommi Robinson Belfast aholisini namoyishlarga undadi. 9 iyun kuni kechqurun niqob taqqan yuzlab kishilar shahar ko‘chalariga chiqib, avtomobillar, avtobuslar, chiqindi idishlarini yoqishdi, vitrinalarni sindirishdi, uylarga o‘t qo‘yishdi, shuningdek, barrikadalar o‘rnatib, yo‘llarni to‘sib qo‘yishdi. Namoyishlar tufayli metro faoliyati to‘xtab qoldi. Belfast o‘t o‘chirish xizmatiga ko‘ra, 10 iyunga o‘tar kechasi shaharning turli qismlaridagi yong‘inlarni o‘chirish uchun 62 marta o‘t o‘chirish brigadalari yuborilgan.

«Xorijliklar yo‘qolsin!» deya hayqirmoqda namoyish ishtirokchilari. Belfastda yashovchilarning bir qismi o‘z xavfsizligi uchun uylarini tark etishga majbur bo‘lishgan.

Shimoliy Irlandiyaning boshqa shaharlari, jumladan, Londonderri, Antrim va Bangorda ham tartibsizliklar bo‘lib o‘tgan.

Shimoliy Irlandiyaning beshta yirik partiyasi yetakchilari zo‘ravonlikni to‘xtatishga va odil sudlovga voqeani o‘rganish imkonini berishga chaqirdi. Shimoliy Irlandiya politsiyasi aholidan xotirjamlikni saqlashni va o‘z noroziligini tinch yo‘l bilan bildirishni so‘radi.

Shimoliy Irlandiya politsiyasi tartibsizliklar ishtirokchilari aniqlanishi va javobga tortilishini va’da qilgan.

«Siz guvoh bo‘layotgan voqealar – irqchilik asosidagi pogromdir», – deya Belfastdagi vaziyatga ta’rif beradi Britaniya parlamentiga Shimoliy Irlandiyadan saylangan deputat Kler Hanna. Shu bilan birga, u «dahshatli» hujum videosi «tushunarli sabablarga ko‘ra» Belfast aholisida «nafrat va shok» uyg‘otganini qayd etgan.

Belfastdagi tartibsizliklar Sauthemptondagi namoyishlardan bir hafta o‘tib sodir bo‘ldi – o‘shanda 18 yoshli talaba Genri Novak o‘ldirilishi ortidan odamlar ko‘chaga chiqqandi. Unga asli hindistonlik bo‘lgan 23 yoshli Vikram Digva bir necha bor pichoq bilan zarba bergan. Voqea joyiga yetib kelgan politsiyachilar Digvani irqchilik ruhidagi jinoyat qurboni deb hisoblashgan va og‘ir ahvolda yotgan Novakni hibsga olishgan.