Fransiya yadroviy kallaklarga ega qiruvchi samolyotlarini Germaniya bilan chegaraga joylashtiradi

Fransiya prezidenti Emmanuel Makron Germaniya bilan chegarada joylashgan Lyuksey-sen-Sover aviabazasiga tashrif buyurdi. U 2035 yilga qadar aviabazaga yadroviy kallaklarga ega Rafale qiruvchi samolyotlarini joylashtirish rejalashtirilganini ma’lum qildi.

«2035 yilda Lyuksey tovushdan tez yadroviy kallaklarga ega yangi modifikatsiyadagi Rafale joylashtiriladigan birinchi aviabazaga aylanadi», — deydi Makron harbiylar oldidagi chiqishi davomida. Yelisey saroyi prezident nutqini X ijtimoiy tarmog‘i orqali translatsiya qilib bordi.

5 mart kuni Fransiya xalqiga murojaatida Emmanuel Makron Rossiya Ukrainadagi urushni global mojaroga aylantirishga urinayotganini ma’lum qilgandi. U yevropalik ittifoqchilariga Fransiya yadroviy quroli yordamida himoyalanishni taklif qildi. YeI davlatlari orasida Germaniya ham ushbu tashabbusni muhokama qilishga tayyorligini bildirdi.

«Biz yadroviy tiyib turuvchi qurollarimiz bilan himoyalanamiz. U keng qamrovli, suveren va to‘liq fransuzcha, — degan Makron. — Biroq men Yevropa qit’asidagi ittifoqchilarimizni yadroviy tiyib turuvchi vositalarimiz orqali himoya qilish borasida strategik muhokamalarni boshlashga qaror qildim».

O‘z navbatida Rossiya prezidenti matbuot kotibi Dmitriy Peskov Makronning Yevropa xavfsizligini kuchaytirish zarurligi va Ukrainaning urushdagi mag‘lubiyatiga yo‘l qo‘yib bo‘lmasligini aytgan xalqqa murojaatini keskin tanqid qildi. Peskov Makronning chiqishini «juda va juda ziddiyatli» deb atadi.