Tramp Makron va uning rafiqasini masxara qildi. Fransiya yetakchisi javob qaytardi

Keyin Tramp Makronning taxminiy javobiga fransuzcha talaffuz bilan taqlid qilishga urindi: «'yo‘q, yo‘q, biz buni qila olmaymiz, Donald. Buni urush g‘alaba bilan tugaganidan keyin qilishimiz mumkinʼ», dedi u. «Men aytdim: yo‘q, yo‘q, menga urush tugaganidan keyin keragi yo‘q, Emmanuel», dedi Tramp.

«Shunday qilib, men NATO haqida bilib oldim: agar qachonlardir 'katta to‘qnashuvʼ sodir bo‘lsa, NATO u yerda bo‘lmaydi. 'Katta to‘qnashuvʼ deganda nimani nazarda tutayotganimni tushunasiz», deya qo‘shimcha qildi Tramp batafsil to‘xtalib o‘tirmasdan.

Makron qanday javob qaytardi?

Eron urushi har kuni o‘zgarib turmaydigan «jiddiy» yondashuvni talab qiladi, dedi Emmanuel Makron Trampning ushbu mojaroga oid bir-biriga zid ko‘rinadigan fikrlariga ochiqdan ochiq ishora qilib.

«Bu shunchaki shou emas. Biz urush va tinchlik, erkaklar va ayollarning hayoti haqida gapiryapmiz», dedi Fransiya prezidenti Janubiy Koreyaga davlat tashrifi bilan kelganida.

«Agar jiddiy bo‘lishni istasangiz, har kuni – bir kun oldin aytgan gapingizning teskarisini aytmaysiz. Va ehtimol, har kuni gapirish ham kerak emasdir. Shunchaki vaziyat tinchishiga qo‘yib berish kerak», deya Makronning so‘zlarini keltirmoqda BBC nashri.

Makron hozirda ikkinchi oyiga qadam qo‘ygan AQSh–Isroilning Erondagi urushi haqidagi savollarga javob berarkan, Trampning NATO haqidagi fikrlariga ham to‘xtalib o‘tdi.

«NATO kabi ittifoqlar aytilmagan narsalar — ya’ni ularning ortidagi ishonch tufayli qadrlidir. Hamkorlar bitimlar imzolaydi va muammolar yuzaga kelganida ishtirok etadi, «ularga amal qilish yoki qilmaslik haqida har kuni izoh berish o‘rniga. Menimcha, quruq gaplar, chalkashliklar juda ko‘p», dedi u.

Makron AQSh va Isroil «o‘zlari mustaqil qaror qilgan» operatsiya bo‘yicha izoh berishni istamasligini qo‘shimcha qildi. «Keyin esa ular o‘zlari yolg‘iz qaror qilgan operatsiyada yolg‘iz qolib ketganlaridan noliydilar. Bu bizning operatsiyamiz emas», dedi Makron.

Makron, shuningdek, 2025 yil iyun oyida AQShning Eronga bergan zarbalarini eslatib o‘tdi: o‘shanda Tramp Eron yadroviy inshootlari «yakson qilinganini» aytgan edi.

«Bugun ham, kelajakda ham tajribaga ega odamlar, yashirin laboratoriyalar va hokazolar bo‘ladi. Shunday ekan, bir necha hafta davom etadigan nishonli harbiy harakatlar yadroviy muammoni butunlay hal qila olmaydi», dedi Makron.

Trampning Fransiya yetakchisi va uning ayolini masxara qilgani haqida Makron bu gaplarni «na nafis, na munosib» deb rad etdi. «Men ularga javob bermayman, ular javobga loyiq emas», dedi u.

Shuningdek, Makron Ho‘rmuz bo‘g‘ozini qayta ochish uchun harbiy operatsiya o‘tkazish g‘oyasiga qarshi chiqib, buni «haqiqatdan yiroq» deb atadi. Chunki bu juda uzoq vaqt talab qiladi va o‘ta xavflidir.

Fransiyada Trampning gaplari juda salbiy qabul qilindi

Makronning oilasi haqidagi gaplar Fransiyada o‘ta salbiy qabul qilindi, hatto Makronning ashaddiy tanqidchilari ham uni himoya qilib chiqdi. «Donald Trampning u bilan bunday gaplashishi va rafiqasi haqida bunday tarzda so‘zlashini mutlaqo qabul qilib bo‘lmas deb hisoblayman», dedi «Bo‘ysunmas Fransiya» partiyasidan Manuel Bompar.

«Biz hozirda dunyo kelajagini muhokama qilyapmiz. Ayni damda Eronda sodir bo‘layotgan voqealar millionlab odamlarning hayotiga ta’sir qilyapti, jang maydonida odamlar o‘lyapti. Bizda esa kulayotgan, boshqalarni masxara qilayotgan prezident bor», dedi Fransiya parlamentining quyi palatasi markazchi prezidenti Yayel Braun-Pive.