«Россия Франция ва Европа учун таҳдидга айланди». Макрoн француз халқига мурожаат йўллади

Франция президенти Эммануэл Макрoн мамлакат халқига мурожаат йўллаб, Россия бутун Европа учун таҳдид эканини маълум қилди.

Макрoн ўз мурожаатини французларни «асосли ташвишга солаётган» «халқаро вазият» билан изоҳлади. У АҚШ Украинадаги уруш бўйича «ўз позициясини ўзгартиргани» ва Европа Иттифоқи товарларига божлар жорий этишни режалаштираётганини таъкидлади.

«Биз янги даврга кириб боряпмиз», — деди Макрoн. Унинг сўзларига кўра, Россия Шимолий Корея аскарлари ва Эрон ҳарбий техникаларидан фойдаланиб, Украинадаги урушни «глобал можаро»га айлантириб юборган. Шунингдек, у Россия ўзининг ҳарбий потенциалини ошираётганини қайд этди. Франция президентининг фикрича, Европа АҚШ «улар тарафида бўлмаслигига» тайёр туриши керак.

«Россия Украинада тўхташига ким ишонади? Россия Франция ва Европа учун таҳдидга айланди… Мен айтаётган вазият ростдан ҳам айнан шундай ва биз буни ҳал этишимиз керак. Ва тинчликка элтувчи йўл Украинасиз бўла олмайди. Украина капитуляцияси орқали тинчликка эришиб бўлмайди. Биз Россия Украинага босқинини 2014 йилда бошлаганини унута олмаймиз. Биз Минскда ўт очишни тўхтатишга келишиб олганмиз», — деди Макрoн.

Макрoннинг маълум қилишича, Европа иттифоқчилари билан ишлаш Франция манфаатларига мос келади. Кейинги ҳафта у «мустаҳкам тинчлик»ни яратишда иштирок этишни хоҳловчи давлатларнинг раҳбарларини тўплайди. Франция ушбу режани Украина ва Европадаги бошқа шериклари билан тайёрлаган.

«Украинада тинчлик тез ўрнатиладими ёки йўқ, Европа давлатлари ўзини яхшироқ ҳимоя қилиш имкониятига эга бўлиши керак. Биз мудофаамизни кучайтиришимиз лозим. Бу масалада биз НАТОга содиқмиз, аммо ўз мустақиллигимизни мустаҳкамлашимиз даркор. Европанинг келажаги Вашингтон ва Москвада ҳал этилиши керак эмас», — дея таъкидлади Макрoн.

Франция президенти, шунингдек, «Европадаги иттифоқчилари билан ядровий тийиб туриш бўйича» мунозарани бошлашга қарор қилганини айтди. «Нима бўлганда ҳам қарор доим президент, қуролли кучлар бош қўмондони томонидан қабул қилинади ва унинг қўлида қолади», — деди Макрoн.

«Европадаги энг самарали армияга эгамиз ва бизда ядровий тийиб туриш имконияти бор. Бу бизни қўшниларимиздан кўра яхшироқ ҳимоя қилади», — дея таъкидлади Франция президенти.