Netanyahu «ShABAK» maxsus xizmatiga yangi rahbar tayinladi

Binyamin Netanyahu vitse-admiral Eli Sharvitni Isroil Bosh xavfsizlik xizmati — «ShABAK» rahbari etib tayinlandi, deb xabar beradi The Times of Israel. Sharvit oldin Harbiy-dengiz kuchlari qo‘mondoni bo‘lgan.

Bosh vazir matbuot xizmati bayonotida keltirilishicha, aynan Sharvit «tashkilotning ulug‘vor an’analarini davom ettiradigan yo‘lda olib chiqishga qodir odam».

Shu bilan birga, «ShABAK»ning Sharvitdan oldingi rahbari Roner Bar hozircha rasman Isroil Bosh xavfsizlik xizmati rahbarligidan ketgani yo‘q.

Vazirlar Mahkamasi mart o‘rtalarida Netanyahuning «ShABAK» rahbari Ronen Barni ishdan bo‘shatish haqidagi munozarali qarorini bir ovozdan ma’qullagan edi. Hukumat qarori ustidan sudga da’vo kiritilgan bo‘lib, hali yakuniy qaror chiqarilmagan.

Nashr ma’lumotlariga ko‘ra, Sharvit arab tilini bilmaydi va oldin hech qachon falastinliklarga aloqador masalalar bilan shug‘ullanmagan, ya’ni «ShABAK» rahbarligi uchun noodatiy yetakchi hisoblanadi. Shu bilan birga, Sharvit Netanyahu 2023 yilda o‘tkazishga uringan sud islohotlariga qarshi namoyishlarda qatnashgan.

«ShABAK» Isroilda ichki xavfsizlikni ta’minlaydi va kontrrazvedka bilan shug‘ullanadi. Roner Bar «ShABAK»ning hukumat lavozimdan olishga uringan birinchi rahbari hisoblanadi.

Ushbu tashkilot 2023 yilda Isroilga uyushtirilgan hujumdan keyin tanqidlarga uchragan edi. Maxsus xizmat faoliyatiga oid hisobotda qayd etilishicha, «ShABAK» hujumga tayyorgarlik ko‘rilayotgani bo‘yicha signallar olgan, ammo bunga qarshi jiddiy choralar ko‘rmagan.