Toshkentdan Lohurga uchadigan reyslar bekor qilinadi

Pokiston va Hindiston o‘rtasidagi chegara hududlarida yuzaga kelgan beqaror vaziyat tufayli faqat 2025 yil 8–9 may kunlari HY461/462 reyslari (Toshkent—Lohur—Toshkent yo‘nalishi) majburiy bekor qilinadi. Bu haqda Uzbekistan Airways xabar berdi.

Qayd etilishicha, bekor qilingan reys yo‘lovchilari chipta narxini qaytarib olish yoki jarimasiz tarzda boshqa sanalarga qayta bron qilish uchun murojaat qilishlari mumkin.

«Aviakompaniya vaziyatni diqqat bilan kuzatishda davom etadi va qabul qilinadigan qarorlar haqida qo‘shimcha ma’lumot beradi. Keltirilgan noqulayliklar uchun uzr so‘raymiz va tushunishingizga umid qilamiz», — deyiladi xabarda.

Eslatib o‘tamiz, Toshkent va Pokistonning Lohur shahri o‘rtasida muntazam aviaqatnovlar o‘tgan yilning noyabr oxirlaridan boshlab yo‘lga qo‘yilgan. Shuningdek, Uzbekistan Airways joriy yilning 14 iyundan boshlab Toshkent—Islomobod—Toshkent yo‘nalishi bo‘yicha muntazam aviaqatnovlarni amalga oshirishi to‘g‘risida xabar berilgandi.