Serbiyadagi namoyishchilar muddatidan oldin saylov o‘tkazishni talab qilmoqda

Serbiyada 1 sentabr, dushanba kuni o‘n minglab namoyishchilar poytaxt Belgrad ko‘chalari bo‘ylab 2024 yilning noyabrida Novi-Sad vokzalining tomi qulashi oqibatida halok bo‘lgan 16 kishi xotirasiga yurish o‘tkazdi. Reuters agentligining xabar berishicha, namoyishchilar fojiada korrupsiyani ayblamoqda va prezident Aleksandar Vuchichning Serb progressiv partiyasini hokimiyatdan chetlatish uchun muddatidan oldin prezidentlik saylovi o‘tkazishni talab qilmoqda. 

Xuddi shunday norozilik namoyishlari mamlakatning boshqa shaharlarida, jumladan Novi-Sad, Kraguyevats, Aleksinatsda ham bo‘lib o‘tdi. Belgradda 16 nafar o‘rta maktab o‘quvchilari har biri oq atirgul tutgan holda Sava maydonidan o‘tdi. Novi-Sad vokzalining tomi qulashi oqibatida halok bo‘lganlarning ismlari o‘qib eshittirildi.

Reuters xabariga ko‘ra, Serbiyada bir necha oydan beri davom etayotgan namoyishlar Vuchich va uning partiyasida noaniqlik tug‘dirmoqda. Shu bilan birga, namoyishchilarning muddatidan oldin parlament saylovlari o‘tkazish talabiga javoban Serbiya prezidenti «demokratik davlatlar har safar namoyishlar bo‘lganda saylov jadvalini o‘zgartira olmaydi», chunki bu «fuqarolarning o‘ziga zarar yetkazadi», deya ma’lum qildi.