Seul AQShdan reyd paytida ushlangan janubiy koreyaliklarni qaytaradi

AQShning Jorjiya shtatida Janubiy Koreyaning Hyundai Motor Group va LG Energy Solution kompaniyalari qurilish maydonchasida o‘tkazilgan reyd chog‘ida 300 dan ortiq ishchi ushlanganidan so‘ng, Seul hukumati Janubiy Koreya fuqarolarini o‘z mamlakatiga qaytarish niyatida. AQSh rasmiylari bilan kelishuv haqida Janubiy Koreya prezidenti devoni rahbari Kan Xun Sik ma’lum qildi.

Uning so‘zlariga ko‘ra, Vashington bilan bu boradagi muzokaralar yakunlangan. Qo‘lga olingan janubiy koreyaliklar uchun zarur ma’muriy tartib-qoidalar tugashi bilan charter reys jo‘natiladi, dedi u.

Avvalroq Seuldagi Tashqi ishlar vazirligi 4 sentabr kuni Hyundai elektromobillar uchun batareyalar ishlab chiqarish zavodida o‘tkazilgan reyd chog‘ida Amerika immigratsiya idoralari tomonidan 300 dan ortiq janubiy koreyalik ushlanganini tasdiqladi. Idoraning ta’kidlashicha, ular qo‘lga olinganlar oldida «katta mas’uliyatni his qilmoqda». Janubiy Koreya hukumati o‘z fuqarolarini nishonga olgan operatsiyadan «tashvish va afsusda» ekanini bildirdi, deb yozadi nashr. Yonhap agentligiga ko‘ra, qo‘lga olingan janubiy koreyaliklarning aksariyati AQShga B1 ish vizasi bilan yoki ESTA vizasiz rejimiga muvofiq qisqa muddatli safar maqsadida kelgan.