Charli Kirkning qotili uni o‘ldirishga qanday tayyorgarlik ko‘rgani aytildi

Prezident Donald Trampning ta’sirli ittifoqchisi Charli Kirk 10 sentabr kuni Yuta universitetida bo‘lib o‘tgan tadbirda otib o‘ldirilgan edi.

Foto: The Daily Beast

AQSh Yuta shtati gubernatori Spenser Koks jurnalistlarga o‘ng qanot faoli Charli Kirkning qotili Tayler Robinson o‘z jinoyatini qanday tayyorlagani haqida gapirib berdi. Bu haqda Corriere della Sera xabar berdi.

Gubernator so‘zlariga ko‘ra, tergov allaqachon Robinsonning xonadoshini so‘roq qilgan, u FQB xodimlariga Discord messenjerida Tayler bilan yozishmalarini ko‘rsatgan.

Xususan, Charli Kirkni o‘ldirishda gumon qilinayotgan shaxs qo‘shnisiga maxfiy joydan miltiqni olib, sochiqqa o‘ralgan holda butalar orasiga yashirmoqchi ekanini aytgan.

Xabarlarda o‘qlarni noyob qiladigan naqshlar haqida ham gapirilgan. Nashrning qayd etishicha, faolning tanasidan olingan o‘qlarda «Bella Ciao» va «Mana ol, fashist» yozuvlari bo‘lgan.

Rasmiylar hozircha jinoyatning sabablari haqida ma’lumotga ega emas. Robinson oilasi a’zolarining aytishicha, u so‘nggi paytlarda siyosatga ko‘proq qiziqa boshlagan va ayniqsa Charli Kirkni tanqid qilgan. Ehtimoliy qotilning so‘zlariga ko‘ra, «Kirk nafratga to‘la bo‘lgan va uni tarqatgan».

Charli Kirkning o‘ldirilishi 10 sentabr kuni sodir bo‘ldi. Prezident Donald Tramp marhumning oilasiga hamdardlik bildirib, qotilni topishga va’da bergan edi.

Tayyorlagan: Сардор Юсупов

#AQSh #Charli Kirk #Tayler Robinson