«Putin to‘xtashi kerak» - Tramp Rossiya haqida bir qator kutilmagan bayonotlar berdi

AQSh prezidenti Donald Tramp Turkiya yetakchisi Rajab Toyyib Erdo‘g‘an bilan uchrashuvi chog‘ida Rossiya rahbari Vladimir Putin «to‘xtashi kerakligini» aytdi.

«Odamlar hayoti bekorga sarflanyapti. U to‘xtashi kerak, Vladimir Putin to‘xtashi kerak... Rossiya bombalar, raketalar, qurol-yarog‘lar va odamlar hayoti uchun millionlab dollar sarfladi, ammo ular deyarli hech qanday hududni egallamadi», dedi Oq uy rahbari.

Erdo‘g‘an haqida gapirar ekan, Amerika yetakchisi Rossiya «Ukrainaga qarshi to‘xtovsiz hujumini davom ettirayotgan» bir paytda Turkiya Rossiyadan neft sotib olishni to‘xtatishini istayotganini ta’kidladi. Shuningdek, u Turkiyaning Ukrainadagi voqealarga ta’sir o‘tkazishi mumkinligini ta’kidladi.

«Hamma Erdo‘g‘anni hurmat qiladi, men ham uni hurmat qilaman. U istasa, Ukrainadagi urushning borishiga katta ta’sir ko‘rsatishi mumkin, biroq betaraf qolishni afzal ko‘ryapti», deb ta’kidladi Tramp va Turkiya prezidenti butun dunyoda, jumladan, Ukraina va Rossiyada ham katta hurmatga sazovor ekanini qo‘shimcha qildi.

Oq uy rahbari so‘zlariga ko‘ra, Erdo‘g‘an qudratli armiya tuzdi va Amerika uskunalaridan faol foydalanmoqda, bundan tashqari, u «Putinni Tramp kabi yaxshi biladi».