«Путин тўхташи керак» - Трамп Россия ҳақида бир қатор кутилмаган баёнотлар берди

АҚШ президенти Доналд Трамп Туркия етакчиси Ражаб Тоййиб Эрдўған билан учрашуви чоғида Россия раҳбари Владимир Путин «тўхташи кераклигини» айтди.

«Одамлар ҳаёти бекорга сарфланяпти. У тўхташи керак, Владимир Путин тўхташи керак... Россия бомбалар, ракеталар, қурол-яроғлар ва одамлар ҳаёти учун миллионлаб доллар сарфлади, аммо улар деярли ҳеч қандай ҳудудни эгалламади», деди Оқ уй раҳбари.

Эрдўған ҳақида гапирар экан, Америка етакчиси Россия «Украинага қарши тўхтовсиз ҳужумини давом эттираётган» бир пайтда Туркия Россиядан нефт сотиб олишни тўхтатишини истаётганини таъкидлади. Шунингдек, у Туркиянинг Украинадаги воқеаларга таъсир ўтказиши мумкинлигини таъкидлади.

«Ҳамма Эрдўғанни ҳурмат қилади, мен ҳам уни ҳурмат қиламан. У истаса, Украинадаги урушнинг боришига катта таъсир кўрсатиши мумкин, бироқ бетараф қолишни афзал кўряпти», деб таъкидлади Трамп ва Туркия президенти бутун дунёда, жумладан, Украина ва Россияда ҳам катта ҳурматга сазовор эканини қўшимча қилди.

Оқ уй раҳбари сўзларига кўра, Эрдўған қудратли армия тузди ва Америка ускуналаридан фаол фойдаланмоқда, бундан ташқари, у «Путинни Трамп каби яхши билади».