Turkmanistonning sobiq bosh prokurori Qurbonbibi Otajonova qamoqda vafot etdi

1997 - 2006 yillarda Turkmaniston bosh prokurori lavozimida ishlagan 78 yoshli Qurbonbibi Otajonova sentabr oyida Dosho‘g‘iz ayollar koloniyasida vafot etdi. Bu haqda Turkmanistonning Xelsinki inson huquqlari jamg‘armasiga tayanib Centralasia xabar berdi.

Qurbonbibi Otajonova oliy yuridik ma’lumotga ega bo‘lgach, tuman prokurori yordamchisidan mamlakat bosh prokurorigacha bo‘lgan yo‘lni bosib o‘tdi. 1997 yil aprel oyida prezident Saparmurod Niyozov uni respublika prokuraturasining eng yuqori lavozimiga tayinladi.

Ta’kidlanishicha, Otajonova prokuraturaga rahbarlik qilgan davrda nazorat organini jazo tizimiga aylantirdi. Turkmanboshining mutlaq ishonchiga tayanib, keng ko‘lamli qatag‘onlarni amalga oshirdi, huquq himoyachilari buni sovet davridagi Yejov va Beriya ta’qiblariga qiyosladi. Ayniqsa, 2002 yil noyabr oyida Niyozovga nisbatan amalga oshmagan suiqasddan keyin yuzlab odamlar hibsga olinganidan keyin ta’qiblar shafqatsiz bo‘ldi.

2006 yil aprelida Otajonova Vazirlar Mahkamasi majlislar zalida hibsga olindi. U korrupsion jinoyatlarda ayblandi - uning 13 ta turar joyi, g‘isht zavodi, tegirmoni, avtoparki, olti million dollardan ortiq puli va boshqa mol-mulki musodara qilinib, barcha unvon va davlat mukofotlaridan mahrum etildi.

2006 yil dekabr oyida Otajonova qizi bilan birga Dosho‘g‘iz ayollar koloniyasiga o‘tkazildi. Ta’kidlanishicha, u koloniyada «xalq dushmanlari» qarindoshlari uchun mo‘ljallangan alohida maxsus blokda saqlangan.