Italiya kompaniyasi O‘zbekistondagi AES qurilishini nazorat qilishga jalb etilishi mumkin

Italiyaning Ansaldo Energia xoldingi O‘zbekistonda atom elektr stansiyasi qurilishiga jalb etilishi mumkin. Bu haqda «O‘zatom» agentligi matbuot xizmati xabar berdi.

Xabarga ko‘ra, «O‘zatom» direktori Azim Ahmadxo‘jayev Ansaldo Energia xoldingi va uning atom energetikasi texnologiyalariga ixtisoslashgan kompaniyalaridan biri — Ansaldo Nucleare rahbariyati bilan uchrashdi.

Tomonlar O‘zbekistonda birinchi atom elektr stansiyasini qurish loyihasini amalga oshirishda texnologik integratsiya va italiyalik hamkorlarning yordamchi tizimlari yechimlarini O‘zbekiston iqlim sharoitiga moslashtirish bo‘yicha hamkorlikni rivojlantirishni muhokama qildi.

Xususan, xolding kompaniyalarini O‘zbekistonda AES qurilishi loyihasini amalga oshirishni nazorat qilish, shuningdek, samarali yordamchi yechimlarni ishlab chiqish uchun texnik maslahatchilar sifatida jalb qilish imkoniyatlari muhokama qilindi.

Ansaldo Nucleare kompaniyasining o‘z ishlanmasi bo‘lgan ishlatilgan yadro yoqilg‘isini boshqarish tizimlarini olish imkoniyati bilan radioaktiv chiqindilar bilan ishlash sohasida kompaniya bilan o‘zaro hamkorlik qilish xususiyatlari batafsil o‘rganildi.

Shu bilan birga, Italiya tomoni milliy normativ-huquqiy bazani shakllantirish va litsenziyalash bo‘yicha maslahat faoliyatini amalga oshirish, shuningdek, ikki mamlakat manfaatlari yo‘lida atom sohasida texnologiyalarni doimiy ravishda takomillashtirish va kadrlar tayyorlash maqsadida qo‘shma ilmiy-tadqiqot va tajriba-konstruktorlik ishlarini tashkil etishga qiziqish bildirdi.

Jizzax viloyatining Forish tumanida kichik quvvatli atom elektr stansiyasi (AES) reaktori binosi uchun poydevor kotlovanini qazish ishlari boshlandi.

O‘zatom xabariga ko‘ra, AES reaktorini joylashtirish uchun 2026 yil mart oyida birinchi betonni quyish ko‘zda tutilgan.