Noyabrda uy-joy savdosi oshdi, ijara narxlari ham o‘sdi

Iqtisodiy tadqiqotlar va islohotlar markazi noyabr oyi uchun O‘zbekistondagi ko‘chmas mulk bozorida kuzatilgan o‘zgarishlar tahlilini taqdim etdi.

Tahlilga ko‘ra, mamlakatda uy-joy oldi-sotdi shartnomalarining umumiy soni o‘tgan yilning shu davriga nisbatan 13,2 foizga oshib, 25 mingta bitimni tashkil etgan. Yillik hisobda eng yuqori o‘sish sur’atlari Buxoro viloyatida (35,4 foiz), Qashqadaryo viloyatida (26,5 foiz) va Samarqand viloyatida (21,7 foiz) qayd etilgan.

Respublika bo‘yicha ikkilamchi uy-joy bozorida yillik hisobda narxlarning o‘rtacha 7 foiz atrofida mo‘’tadil o‘sishi kuzatilgan.

Ijara bozori bo‘yicha esa, noyabr oyida Toshkent shahrida o‘rtacha ijara narxi 1 kv.m uchun 8,7 dollarni tashkil etgan. Bu ko‘rsatkich o‘tgan yilning shu davriga nisbatan 5 foizga yuqori ekani aytildi.