Ipotekaga olingan uyga boshqa shaxslarni ro‘yxatga qo‘yishda bankning ruxsati talab etilmaydi

O‘zbekistonda ipoteka hisobiga sotib olingan uyga boshqa shaxslarni bankning roziligisiz ro‘yxatga qo‘yish mumkin bo‘ldi. Bunday tartib 15 iyul imzolangan prezident qarorida ko‘rsatilgan.

Qarorga ko‘ra, taqiq yoki xatlov qo‘yilgan turar joyga garovga oluvchining roziligisiz yashash va turgan joyi bo‘yicha ro‘yxatdan o‘tkazishga ruxsat beriladi. Bunda ro‘yxatdan o‘tkazilayotgan shaxs mulkdorning (garovga oluvchining, taqiqni qo‘yishga yoki yechishga mas’ul organning) ichki ishlar organlariga qilgan murojaati asosida uning ro‘yxatdan o‘tkazilganligi bekor qilinishiga avvaldan rozilik berishi zarur.

Shuningdek, qarorga asosan, 2027 yil 1 yanvardan boshlab quyidagilar joriy etilishi ham belgilangan:

• ko‘chmas mulkka bo‘lgan huquqlarni davlat ro‘yxatidan o‘tkazish paytida huquq egasi o‘z vaqtida ro‘yxatdan o‘tkazuvchi organga murojaat etmaganligi aniqlanganda ma’muriy javobgarlik qo‘llanilmaydi va kechiktirish muddatidan kelib chiqib ro‘yxatdan o‘tkazish uchun oshirilgan stavkalarda to‘lov undiriladi;

• soliq to‘lovchiga xususiy mulk huquqi asosida tegishli bo‘lgan turar joy meros tartibida yoki yaqin qarindoshidan hadya sifatida olingan bo‘lsa, ushbu turar joyni sotishdan olingan daromadga soliq solinmasligi uchun belgilangan muddat vasiyat qiluvchi yoki hadya qiluvchining mazkur turar joyga bo‘lgan mulk huquqi davlat ro‘yxatidan o‘tkazilgan sanadan boshlab hisoblanadi.