SBU Qora dengizdagi yagona Il-38 samolyotiga zarar yetkazilganini ma’lum qildi

Ukraina Xavfsizlik xizmati (SBU) Yeysk aerodromida Rossiyaning dengiz patrul samolyoti Il-38N nishonga olinganini ma’lum qildi. SBUning xabar berishicha, u Qora dengizda RFdagi shunga o‘xshash yagona mashinasi bo‘lgan. Bu haqda SBU 23 dekabr, seshanba kuni kechqurun ma’lum qildi.

SBU Il-38N ga zarba bergan dron kamerasi yozuvini e’lon qildi. Operatsiya sanasi aniqlashtirilmagan. Video asosida yetkazilgan zarar ko‘lamini aniq baholash mumkin emas. SBU samolyot foydalanishdan chiqarilganini da’vo qilmoqda. RF Mudofaa vazirligi bunga izoh bermagan.

Il-38N — bu sovetcha Il-38 samolyoti bo‘lib, unga “Novella” suvosti kemalariga qarshi kompleksi o‘rnatilgan. Rossiya flotiga shunday bir necha mashina yetkazib berilgan, ularning aniq soni noma’lum. 2016 yilda 8 dona degan taxmin tilga olingan. RF Mudofaa vazirligi esa ochiq manbalarda faqat bir necha Il-38N Tinch okeani floti qurollanishida ekanini ma’lum qilgan.

SBUning ta’kidlashicha, urib shikastlantirilgan samolyot RFning Qora dengizdagi shunday turdagi yagona mashinasi bo‘lgan. Uning yo‘q qilinishi (yoki ishdan chiqarilishi) UQKning dengiz dronlariga erkin harakat qilish imkonini bergan va 15 dekabr kuni Novorossiyskda RF suvosti kemasiga zarba berishga sharoit yaratgan.

SBU hali ham suvosti kemasi muvaffaqiyatli nishonga olinganini aytib kelmoqda. RF Mudofaa vazirligi esa avvalroq buni rad etgan va submarina pirs yonida ko‘zga ko‘rinarli shikastlarsiz turgani aks etgan videoyozuvni e’lon qilgan.