СБУ Қора денгиздаги ягона Ил-38 самолётига зарар етказилганини маълум қилди

СБУ маълум қилишича, Қора денгизда Россиянинг ягона сувости кемаларига қарши самолёти — Ил-38Н фойдаланишдан чиқарилган. РФ Мудофаа вазирлиги зарба ҳақида изоҳ бермаган. Киевда таъкидланишича, усиз Москва денгиз дронларини ушлаб қололмайди.

Фото: Видеодан кадр

Украина Хавфсизлик хизмати (СБУ) Ейск аэродромида Россиянинг денгиз патрул самолёти Ил-38Н нишонга олинганини маълум қилди. СБУнинг хабар беришича, у Қора денгизда РФдаги шунга ўхшаш ягона машинаси бўлган. Бу ҳақда СБУ 23 декабр, сешанба куни кечқурун маълум қилди.

СБУ Ил-38Н га зарба берган дрон камераси ёзувини эълон қилди. Операция санаси аниқлаштирилмаган. Видео асосида етказилган зарар кўламини аниқ баҳолаш мумкин эмас. СБУ самолёт фойдаланишдан чиқарилганини даъво қилмоқда. РФ Мудофаа вазирлиги бунга изоҳ бермаган.

Ил-38Н — бу советча Ил-38 самолёти бўлиб, унга “Новелла” сувости кемаларига қарши комплекси ўрнатилган. Россия флотига шундай бир неча машина етказиб берилган, уларнинг аниқ сони номаълум. 2016 йилда 8 дона деган тахмин тилга олинган. РФ Мудофаа вазирлиги эса очиқ манбаларда фақат бир неча Ил-38Н Тинч океани флоти қуролланишида эканини маълум қилган.

СБУнинг таъкидлашича, уриб шикастлантирилган самолёт РФнинг Қора денгиздаги шундай турдаги ягона машинаси бўлган. Унинг йўқ қилиниши (ёки ишдан чиқарилиши) УҚКнинг денгиз дронларига эркин ҳаракат қилиш имконини берган ва 15 декабр куни Новороссийскда РФ сувости кемасига зарба беришга шароит яратган.

СБУ ҳали ҳам сувости кемаси муваффақиятли нишонга олинганини айтиб келмоқда. РФ Мудофаа вазирлиги эса аввалроқ буни рад этган ва субмарина пирс ёнида кўзга кўринарли шикастларсиз тургани акс этган видеоёзувни эълон қилган.

Тайёрлаган: Отабек Матназаров

#Россия #Украина #самолёт