Inspeksiya: qurilish, uy-joy va suv tarmoqlarida qator qonunbuzilishlar aniqlandi

Qurilish va uy-joy kommunal xo‘jaligi sohasida nazorat qilish inspeksiyasining 2025 yildagi faoliyatiga doir ma’lumotlar Inspeksiya tomonidan o‘tkazilgan brifingda e’lon qilindi.

Ma’lum qilinishicha, 2025 yil davomida respublika bo‘yicha 26 804 ta qurilish obektida olib borilayotgan qurilish-montaj ishlari davlat nazoratiga olingan. Ushbu obektlarda hududiy inspeksiyalar tomonidan 370 676 marotaba nazorat va monitoring tadbirlari tashkil etilgan.

Shuningdek, 24 671 ta ko‘p kvartirali uy-joyning texnik holati o‘rganilib, 7 mingga yaqin qonunbuzilish holati aniqlangan. Qayd etilishicha, kamchiliklarni bartaraf etish bo‘yicha tegishli choralar ko‘rilib, ma’muriy jarimalar qo‘llangan hamda sudlarga da’vo arizalari kiritilgan.

Bundan tashqari, ichimlik va oqova suv tarmoqlariga 5 745 ta noqonuniy ulanish holati aniqlanib, ularning barchasi bo‘yicha qonunchilikka muvofiq choralar ko‘rilgan.