Moskvada biznesmen Umar Jabroilov vafot etdi

Moskvada Chechenistondan Federatsiya kengashining sobiq a’zosi Umar Jabroilovning jasadi Tverskaya ko‘chasidagi mehmonxonadan topilgani haqida Telegram-kanallar xabar berdi. Uning o‘z joniga qasd qilgani huquqni muhofaza qiluvchi organlar TASS agentligiga tasdiqlagan.

Foto: RIA Novosti

OAV ma’lumotlariga ko‘ra, Moskvada biznesmen, Chechenistondan Federatsiya kengashining sobiq a’zosi Umar Jabroilov o‘z joniga qasd qilgan. Sobiq senatorning o‘z joniga qasd qilgani haqida 2 mart, dushanba kuni Rossiyaning TASS axborot agentligi huquqni muhofaza qiluvchi organlardagi manba va Jabroilovning sobiq advokatiga tayanib xabar berdi.

Mash Telegram-kanalining yozishicha, sobiq senatorning jasadi Tverskaya ko‘chasidagi mehmonxonadan topilgan, uning yonida to‘pponcha bo‘lgan. Shuningdek, Jabroilovning o‘z joniga qasd qilgani haqida Baza va RBK ham o‘z manbalariga tayanib xabar qilgan.

Mash ma’lumotiga ko‘ra, Umar Jabroilov 2020 yilda ham o‘z joniga qasd qilishga uringan. U 2004–2009 yillarda Chechenistondan Rossiya Federatsiya kengashida vakillik qilgan hamda xalqaro ishlar qo‘mitasi raisi o‘rinbosari lavozimida ishlagan.