Intervyu. Aziz Murtazayev Facebook’ning ichki muhiti haqida so‘zladi
|20:44 / 19.09.201618 82923 min
Likeit.uz sayti Qoraqalpog‘istonning Nukus shahrida tavallud topgan va hozirda Facebook’ning Buyuk Britaniyadagi ofisida ishlaydigan Aziz Murtazayev bilan uyushtirgan intervyusini taqdim etdi.
Bundan oldinroq, qozog‘istonlik video-blogger Aziz Murtazayev haqida xabar berib ulgurgan va ushbu iqtidorli yigit keyingi kunlarda ijtimoiy tarmoqlarda mashhur bo‘lib ketgandi.
Quyidagi suhbatda Aziz Martazayev haqida yangi va batafsil ma'lumotlardan boxabar bo‘lish mumkin.
Qachondan beri Facebook’da ishlaysiz?
— Facebook bilan eng birinchi kontakt 2014 yilning sentabrida bo‘lgan va suhbatlar 2015 yilning fevraligacha davom etgan. Facebook’ning London ofisida 2015 yil, 14 sentabrda ish boshlaganman.
Facebook’ning qayerdagi ofisi yoki ofislarida, qaysi lavozim yoki lavozimlarda faoliyat olib borasiz, borgansiz?
— Hamma suhbatlardan muvaffaqiyatli o‘tib bo‘lgandan keyin Kaliforniyadagi bosh ofisiga (Menlo Park) ishga taklif qilishdi. Facebook’ning Amerikadagi ofisida ishlash uchun ish vizasini (H1B) olish talab qilinar edi. Bu viza turini olish judayam qiyin, chunki qancha odam topshirishidan qat'i nazar yiliga faqat 65 000 dona viza beriladi.
Men ham shunday viza olmoqchi bo‘lgan yilda 233 000 kishi topshirgan va lotereya asosida 65 000 kishini tanlab olingan.
Men viza olganlar tarkibida bo‘lmaganman, lekin yaxshi hamki, alternativ variant bor edi.
Facebook ishga taklif qilganida, “Agar Amerikaga viza berilmasa, Facebook’ning Londondagi ofisida ishlashingiz mumkin bo‘ladi”, deb aytilgan edi. Shunday qilib, 2015 yilning sentabridan boshlab Londondagi ofisida ishlay boshladim.
Facebook’ga Android operatsion tizimida ishlaydigan dasturchi-muhandis bo‘lib ishga kirdim.
Eng qizig‘i Facebook’da muhandislar bir-birining lavozimlarini bilmaydi. Ya'ni sistemada boshqa ishchining lavozimini bilish mumkin emas va ishchi faqat o‘z lavozimini ko‘ra oladi.
Facebook’ning ish madaniyatiga ko‘ra, har xil lavozim — katta muhandis, kichik muhandis kabilar xodimlar orasida muomalaga sun'iy to‘siq yasaydi, deb hisoblanadi. 5 yillik ish tajribasi bor muhandis bilan universitetni endi tugatib, ishga kirgan muhandislar bir xil imkoniyatlarga ega.
Mavzuga oid
Facebook’da ish boshlashingiz qanday bo‘lgan?
— Facebook’ka kirgan hamma ishchilar “Bootcamp” deb nomlangan trening dasturini o‘tib bo‘lib ish boshlaydi.
Bootcamp — bu 5-6 haftalik dastur bo‘lib, ishchilar Facebook’ning hamma texnologiyalari bilan tanishib chiqadi va dastur oxirida ishchilar istalgan jamoasida ish boshlashga tayyor bo‘ladi.
Facebook’ni boshqa kompaniyalardan ajratib turadigan narsasi — ishchilar ish boshlaganining birinchi haftasidayoq Facebook veb-dasturiga o‘zgartirishlar kiritishi mumkin.
Men eng birinchi “commit” — sistemaga o‘zgartirish kiritiladigan kodni ish boshlaganimga 5 kun bo‘lganida qilganman va bunday holat keng tarqalgan.
Boshlang‘ich 3 haftada, Londonda Facebook’ning asosiy texnologiyalari haqida kurslar bo‘ldi va oson/o‘rtacha topshiriqlar ustida ishladik.
Undan keyin 2 hafta Kaliforniyadagi bosh ofisda treningni davom ettirdik va bu safar har kim o‘z yo‘nalishi bo‘yicha kurslarni davom etdi.
Men Android dasturchi bo‘lib ishga olinganimdan keyin, shu operatsion tizim bo‘yicha kurslarni o‘tdim va Android bo‘yicha topshiriqlarni qildim.
Facebook’ning Android mobil ilovasida oddiy dasturlashda ishlatiladigan texnologiyalardan ancha farqli texnologiyalar ishlatiladi. Chunki Facebook’ning Android ilovasi standart Android ilovasiga nisbatan ancha katta ilova hisoblanadi va standart yondashuvlar Facebook miqyosida ishlamaydi.
Kaliforniyadan qaytib kelgandan keyin jamoa tanlash bilan shug‘ullandik. Jamoani ishchilar o‘zlari o‘z qiziqishiga qarab tanlashadi.
Muhandislar kerak jamoalar o‘z faoliyati haqida ichki veb-saytda e'lon qilib qo‘yadi va qanday muhandis kerakligini ko‘rsatib o‘tadi (masalan, iOS, Android, generalist).
Bootcamp’ni bitirganlar ularga qiziqqan jamoalar yetakchilari bilan suhbatlar qilib, jamoada qilinadigan ish muhandis qiziqishiga qanchalik to‘g‘ri kelishi, kelmasligini bilib olishi mumkin.
Odatda ishga kirgandan keyin 5-8 haftada muhandislar o‘z jamoasini topib oladi.
Ishga kirish suhbati qanday o‘tgan?
— Menda ishga kirish jarayoni uch bosqichli suhbatdan iborat bo‘lgan. Suhbatlarning eng boshidagi tanishuv suhbatidan tashqari hammasini Facebook’ning muhandislari olib borgan.
Eng birinchi suhbat onlayn — Skype orqali bo‘lgan. Onlayn suhbat bir soat davom etgan va unda ilk 10-15 daqiqa oldingi ish tajribam haqida va keyin Android bo‘yicha texnik savollar berilgan.
Undan keyin asosiy qismiga o‘tdik va berilgan algoritmik masalani 30-40 daqiqa davomida hal qildim. Ya'ni intervyu o‘tkazayotgan kishi va men ko‘ra oladigan onlayn-hujjat ochiladi, shunda men berilgan masala yechimi kodini yozishim kerak.
Intervyuda kod yozish, kompyuterda kod yozishdan ancha farq qiladi, chunki kompyuterda kod yozganda dasturlash muhitining har xil qulayliklaridan foydalanish mumkin.
Shuning uchun ham intervyuga tayyorlanganda algoritmik masalalar yechimini qog‘ozda yechib ham o‘rganish kerak.
Boshida masalani qanday yo‘l bilan yechmoqchiligimni og‘zaki tushuntirib berdim va yechimining kodini yozishga o‘tdim.
Kodni yozishda intervyu qabul qilayotgan kishi nafaqat oxirgi natijasiga qaraydi, balki kod yozish jarayoniga ham e'tibor beradi.
Bu yerda masalani qanday usul bilan yechilishini aniq tushuntira olish, kodni toza yozish, chekka holatlarni (edge cases) hisobga olish muhim hisoblanadi.
Masalani yechib bo‘lgandan keyin 5-10 daqiqa kandidat, ya'ni men intervyu olayotgan kishiga xohlagan savolimni berishim mumkin.
U Facebook’da qandaydir texnologiyaning ishlatilishi, kompaniyadagi muhit, kompaniya madaniyati va shunga o‘xshagan savollar bo‘lishi mumkin. Umuman olganda, birinchi intervyu ko‘nglimdagidek bo‘lib o‘tgan.
Birinchi intervyuning javobi bir hafta o‘tmasdan keldi va ijobiy natija bo‘lgani haqida menga ma'lum qilishdi.
Keyingi bosqich, ya'ni ikkinchi onlayn intervyu qilinadigan bo‘ldi. Intervyuga yaxshilab tayyorlanish maqsadida uni bir oydan keyin o‘tkazishga kelishib oldik.
Ikkinchi intervyu strukturasi xuddi birinchisidagidek bo‘ldi.
Boshida Android bo‘yicha savollar berildi va hammasiga yaxshi javob bera oldim. Chunki shu paytga qadar Android bilan 3 yil shug‘ullanayotgan edim.
Keyin algoritmik masalani yechishga o‘tdik. Bu safar birinchi intervyudagidek yaxshi o‘tmadi va masalani ko‘nglimdagidek yecha olmadim.
Mening yechgan yo‘limda bir, ikkita chekka holatlarni (edge cases) hisobga olmagan ekanman.
Ikkinchi intervyuning javobi ham tezda keldi. Unda men keyingi bosqichga o‘tganim haqida ma'lum qilingandi.
Buni eshitib, juda ham xursand bo‘lganman. Chunki ikkinchi intervtyudan o‘ta olmagan bo‘lsam kerak deb o‘ylagan edim.
Ular meni keyingi bosqichga chaqirish/chaqirmaslik qarorini qabul qilishda nafaqat ikkinchi intervyuning natijasiga qarashgan, balki boshqa omillar ham hisobga olingan.
Oldingi ishxonamda qilgan ishlarim (Facebook’dan oldin Janubiy Koreyada Samsung Electronics’da ishlaganman), meni bo‘sh vaqtimda qilgan Android dasturim shular jumlasidan edi.
Ayniqsa, ularga men tuzgan va Google Play’ga joylashtirilgan Android dasturim ma'qul kelgan.
Keyingi (oxirgi) bosqich Facebook’ning Kaliforniyadagi ofisida bo‘lgan va Seuldan San-Frantsiskoga chiptalar, mehmonxona, ovqat, taksi va shunga o‘xshash xarajatlarning hammasini o‘zlari qoplab berishgan.
Oxirgi bosqich ketma-ket to‘rt intervyudan iborat bo‘lgan. Har bir intervyu bir soat davom etgan.
To‘rt intervyudan ikkitasida Android bo‘yicha masala berilgan va doskada yechimining kodini yozganman.
Uchinchi intervyu “system design” bo‘yicha bo‘lgan va unda ham Android’ga bog‘liq masala berilgan.
To‘rtinchi intervyuning yarimi algoritmik savol, yarimi “behavioral questions” bo‘lgan, ya'ni men kompaniya madaniyatiga qanchalik to‘g‘ri kelishimni savollar berib tekshirishgan.
Ikkinchi intervyudan keyin “tushlik intervyu” bo‘lgan, ya'ni bu rasmiy intervyu bo‘lmasa ham, bunda Facebook xodimi bilan tushlik qilganmiz va shu paytda Facebook haqida xohlagan savol berishim mumkin edi va buning boshqa intervyularga ta'siri bo‘lmagan.
Seulga qaytib borganimdan keyin bir hafta o‘tmasdan ulardan ijobiy javob kelgan va menga ish taklifini berishgan.
Men ikkilanmasdan bu taklifni qabul qilganman va o‘sha paytda o‘zimni juda ham baxtli sezganman.
Facebook’da ishlash qanday? Boshqa ishlagan joylaringizdan farqi, ish rejimi, imkoniyatlar, qulayliklar, jamoadagi kayfiyat…
— Bizning ofisimiz juda ham noodatiy va u yerda xodim o‘zini noqulay his qilmasligi va turli xil maishiy savollarga chalg‘imasligi uchun barcha sharoit yaratilgan.
Kompaniya xodimlari uchun bepul, uch mahal ovqat beradi. Xodim tongda ishga kelgach, uni turli xil meva, salat, sharbat, tuxumning turli ko‘rinishi va boshqa bir qancha narsalardan qilingan nonushta kutadi.
Tushlikda esa eng ko‘p turdagi ovqatlar beriladi va har kim xohlaganini ta'biga qarab tanlashi mumkin.
Har bir ovqat maxsus belgiga ega. Bu esa ovqatlanishda biror cheklovga ega kishilar o‘zlariga mos ovqatni tanlashlarida yordam beradi. Masalan, kimdadir yong‘oqqa allergiya bo‘lishi, kimdir vegetarion bo‘lishi mumkin.
Shuningdek, har bir ovqat uch xil rang bilan belgilanadi. Agar yashil bo‘lsa, bemalol ko‘p yeyish mumkin. Masalan, turli salatlarni.
Qizil bo‘lsa, ko‘p yeyish tavsiya etilmaydi. Masalan, mol go‘shti. Bular xodimlarning sog‘ligini o‘ylab qilingan. Ovqat hajmi esa cheklanmagan.
Sariq rang esa qizil va yashil o‘rtasini bildiradi.
Bundan tashqari, har doim turli xil pishiriqlar, shokolad, muzqaymoq, shirinliklar va ichimliklar mavjud bo‘ladi.
Vaqti-vaqti bilan xodim ishdan chalg‘ishi va ishga yangi kuch bilan qaytishi uchun har xil o‘yin xonalari bor. Ularda ping-pong, stol futboli, PS4, Xbox o‘ynash yoki cholg‘u asboblaridan foydalanish mumkin.
Facebook’da ish grafiki juda erkin. Bu yerda xodimning ishda o‘tkazgan vaqtini hisoblash sistemasi yo‘q. Bu esa xodim ofisdan tashqarida ishlashi ham mumkinligi uchun shunday.
Har bir xodimning o‘z noutbuki bor va ba'zida uydan ishlash ham mumkin. Bu normal holat hisoblanadi.
Chorshanba esa majlislar bo‘lmaydigan kun deb qabul qilingan. Xodimlar shu kuni ishga umuman kelmasliklari va uydan ishlashlari mumkin.
Kasallik uchun ta'til olishda cheklov yo‘q. Agar kasallansangiz, shunchaki menejyerni ogohlantirib qo‘yish yetarli. Kasal bo‘lib qolganda ishga chiqmaslik va qahramonlik ko‘rsatmaslik tavsiya qilinadi.
Xodimlarga ishonish darajasi juda hayratlanarli va kompaniyaning qarashlaricha, xodimlarning o‘zi qachon ishlaganlari foydali bo‘lishini yaxshi bilishadi.
Doimiy tarzda Mark Zukerberg bilan savol-javoblar sessiyasi (Q&A session) o‘tkazilib turiladi. Unda xodimlar kompaniya faoliyatiga oid o‘zlarini qiziqtirgan va xavotirlantirgan savollarni berishlari mumkin.
Bu xodimlar o‘z fikrlarini berishlari va top-menejment fikrini bilishlari uchun ajoyib imkoniyat.
London ofisida (Kaliforniyadagi bosh ofisdan tashqari barcha ofislarda ham) Free Lunch Wednesday va BFF dasturlari mavjud.
Har chorshanba ofisdan tashqarida istalgan restoranda 5 kishidan kam bo‘lmagan xodimlar bilan birga borsa bo‘ladi va bunda har bir xodimga 25 funtgacha xarajati qoplanadi.
Shu bilan birga har bir xodim kino, teatr, muzey, konsertga borish kabi biror tadbir uyushtirishi mumkin. 5 kishidan kam bo‘lmagan bunday jamoalarning har bir a'zosining ham 25 funtgacha xarajati kompaniya tomonidan qoplanadi.
Bu boshqa jamoalardagi xodimlar bilan tanishish uchun yaxshi imkoniyat va u jamoalar o‘rtasidagi muloqot yaxshilanishiga xizmat qiladi.
Tez-tez xakatonlar o‘tkazilib turiladi. Ular kun bo‘yi davom etadi va unda odatiy ishdan boshqa ideyalar ustida ishlash mumkin.
Shunday xakatonlar sabab, Facebook uchun yangi va qiziq loyihalar yuzaga keladi.
Qayerlarda o‘qigansiz?
— Maktabni tugatgach, O‘zbekiston Milliy universitetining “Iqtisod” fakultetiga o‘qishga kirganman.
Umuman olganda, o‘qishga kirguncha iqtisod haqida hech qanday tushunchaga ega bo‘lmaganman. Hal qiluvchi faktor esa o‘qishga kirish fanlarini yetarlicha yaxshi bilishim bo‘lgan.
Men matematika bilan shug‘ullanganman va ingliz tilini yaxshi bilganman. O‘sha paytda bu fanlar bilan oliy ta'lim dargohiga kirish mumkin bo‘lgan sohalar ichida iqtisod eng qiziqarlisi deb o‘ylaganman.
Taxminan uchinchi kursda iqtisod umuman mening soham emasligini his qila boshlaganman. Gumanitar fanlardan ko‘ra menga aniq fanlar ko‘proq ma'qul edi.
Keyin esa kursdoshlarimiz bilan bitta markaz talabalarni tekinga dasturlashga o‘qitishi haqida bilib qolganmiz va o‘zimizni sinab ko‘rishga qaror qilganmiz.
Bu markaz “Yosh dasturchilarni tayyorlash va qo‘llab-quvvatlash markazi” deb nomlangan va unda .NET platformasi asosida dasturlashni o‘rgatishgan.
3 oy davomida darslardan so‘ng, haftasiga 5 kun, kuniga uch soatdan shu markazga qatnaganmiz. Menga dasturlash juda yoqqan va yomon chiqmagan.
O‘quv kurslari tugagach, yakuniy loyihamni topshirganman va markaz hamkorlik qiladigan kompaniyalardan biri — NetDec’ga ishim ma'qul kelib, meni amaliyot o‘tashga chaqirgan. U yerda yarim yil ishlaganman.
Universitetni bitirganimda, o‘qishni tugatganimdan so‘ng kim bo‘lib ishlashim haqida hech qanday shubham qolmagan edi.
Shundan so‘ng ikki yil Toshkentdagi Muransoft kompaniyasida ishladim va keyin Janubiy Koreyaga magistratura o‘qish uchun jo‘nab ketdim.
Magistraturani rivojlangan davlatlardan birida o‘qishni juda orzu qilganman va turli xil Yevropa universitetlariga ham hujjatlarimni topshirganman.
Software Engineering yoki Computer Science bo‘yicha magistraturada o‘qishni juda xohlaganman. Lekin bakalavr diplomim iqtisod bo‘yicha bo‘lgani bois, ko‘plab universitetlar qabul boshida meni rad qilishgan.
Keyin esa Janubiy Koreya universitetlariga hujjat topshirishga harakat qilib ko‘rganman. Va baxtimga, bitta universitet, to‘g‘rirog‘i shu universitetning professorlaridan biri meni o‘qishga qabul qilishga rozi bo‘lgan va men Suvon shahridagi Adjou universitetiga kirganman.
Computer Engineering fakultetida o‘qiganman. U yerda olingan nazariy bilimlarim kompyuter ilmidagi probellarim o‘rnini to‘ldirishda katta yordam bergan.
Kasbingiz qanday, nimalar qilgansiz, qaysi dasturlash tillarida ishlaysiz?
— Janubiy Koreyadagi universitetni bitirgach esa o‘zim o‘qigan shahar — Suvondagi Samsung Electronics’da ish boshladim.
Ishga kirishda bo‘lgan intervyulardan birida mendan Samsung’da nima bilan shug‘ullanishga qiziqishim haqida so‘rashdi. Men esa ikki xil sfera: Android’da dasturlash va tizim taqsimoti (Distributed Sytsems) deganman.
Yakunda esa Samsung smartfonlarining foydalanuvchi interfeysini ishlab chiqadigan jamoadan o‘rin egallaganman. U yerda Android’da ishlaganmiz va Java’ni asosiy dasturlash tili sifatida foydalanganmiz.
Hozir ham Facebook’da Android bo‘yicha ishlayman va Facebook Lite mahsuloti ustida ishlayman.
Shuningdek, o‘z loyihalarimda avval Python dasturlash tilidan ham foydalanganman.
Qaysi tillarni bilasiz va ular Facebook’da ishlashingizda qanday imkoniyatlar yaratmoqda?
— Xorijiy tillardan rus va ingliz tillarini bilaman. Janubiy Koreyada ham uzoq payt ingliz tilida muloqot qilganman.
Koreyadaligimda koreys tilini ancha o‘rgandim, ammo hozir deyarli ishlatmasligim sabab esimdan chiqmoqda.
Facebook’da ruscha gaplashadigan xodimlar ko‘p. Ular asosan Rossiya va Ukrainadan. Biz o‘zaro rus tilida muloqot qilamiz.
Biroq, rus tilida suhbatlashadigan xodimlar bizning jamoamizda yo‘q. Agar bo‘lganida ishlash osonlashardi. Lekin hamma ingliz tilida yetarlicha yaxshi gaplasha oladi.
Mahalliy tillardan esa qoraqalpoqcha (ona tilim) va o‘zbekchani bilaman, qozoqchani tushunaman.
Qayerliksiz? Bolalikdagi orzularingiz? Masalan, dasturchi bo‘lishni orzu qilgandirsiz va unga qanday erishgansiz?
— Men Qoraqalpog‘istonning Nukus shahrida tug‘ilganman va katta bo‘lganman. 37-litseyning matematikaga chuqurlashtirilgan sinfida maktabni yakunlaganman.
Sharoitlar bo‘lsa ham, hech qachon dasturchi bo‘laman deb o‘ylamaganman. Bolaligimda otam shanba kunlari meni ishiga olib borgan va shunda birinchi marta kompyuter nima ekanligini bilganman.
O‘shanda asosan faqat kompyuter o‘yinlarini o‘ynaganman va MS-DOS hamda Windows haqida biroz o‘rganganman. Keyinchalik esa uyimizda kompyuter bo‘lgan va unda turli xil dasturlardan foydalanishni o‘rganganman. Ammo dasturlash bilan qiziqmaganman.
Kelajakda kim bo‘lishim haqida bolalikda o‘ylamaganman. Menga maktabdagi ma'lum fanlar, ayniqsa matematika juda yoqqan.
Kelajak rejalaringiz qanday?
— Qisqa qilib aytganda, Facebook’da ishlab turganimda, bu yerda yaratilgan imkoniyatlardan iloji boricha ko‘proq foydalanishni xohlardim. Bunday imkoniyatlar esa quyidagicha:
a) Texnik bilimlar: Android, Java va biz bu yerda foydalanadigan texnologiyalarni chuqurroq o‘rganish. O‘zim hamda boshqalarni doimiy o‘qitish;
b) Dasturiy mahsulot yaratish: Bu yerda mahsulot ishlab chiqarilishiga yondoshishlari juda yoqadi. Bitta loyiha ustida UX Researcher, Data Scientist, Designer, Content Strategist, Product Specialist va boshqa platforma (Android, iOS, web) dasturchilari birgalikda ishlashadi.
UX Researcher mahsulot foydalanuvchi tomonidan qanday foydalanishi ustida ishlaydi, Data Scientist esa mahsulot foydalanilganidan ma'lumotlarni analiz qiladi va hisoblaydi, Designer esa foydalanish interfeysi (User eXperience)ni qiladi va mahsulot bilan mosligi (User eXperience)ni tekshiradi, Content Strategist mahsulotda foydalanilgan so‘zlarga javob beradi, dasturchilar loyihaning qiyinligini baholaydi va taxminlar beradi. Keyin esa ishlab chiqish boshlanadi.
Ular bilan ishlab, mahsulot qanday tayyorlanishi haqida tasavvur uyg‘onadi. Bu esa babaho tajriba. Jarayon esa ko‘pchilik kompaniyalarda deyarli bir xil.
Shuningdek, bu yerda barcha qarorlar shunchaki qabul qilinmasligi, aniq hisob-kitoblar (metrikalar) asosida bo‘lishi menga yoqadi.
Masalan, Product Manager, “Menga shu versiya yoqdi, u yaxshi ko‘rinmoqda, shuni ishga tushiramiz” – deya olmaydi.
Aniq hisob-kitoblar bo‘lishi zarur. Masalan, bu versiya video ko‘rishlar sonini oshirdi yoki yuklanishi 10 foizga tezlashdi, kabi ma'lumotlar bo‘lishi kerak va shundan so‘ng yangi versiyani ishga tushirish mumkin.
c) Professional aloqalar: Bu yerda juda aqlli muhandislar va turli soha, turli shaharliklar bilan ishlash mumkin. Ulardan ko‘p narsa o‘rgansa bo‘ladi va bu kelajakda boshqa loyihalarda hamkorlik qilish imkonini beradi.
Facebook’da menga yana ham ko‘proq narsalar o‘rganish mumkinligi yoqadi. Qachondir Facebook’ni tark etish kerak bo‘lsa, men o‘zimni katta darajaga chiqish istagida bo‘lgan kichik kompaniya, biror startapda sinab ko‘rishni xohlardim.
Facebook’da qilinayotgan yangiliklar haqida bo‘lisha olasizmi?
— Afsuski, biz yangi loyihalar haqida gapira olmaymiz.
Facebook’dan biror yordam bera olasizmi? Umuman so‘rab turishadimi?
— Facebook foydalanuvchilarining ma'lumotlaridan foydalanishlariga qattiq e'tibor beradi. Bu esa xodimlarga juda taalluqli.
Agar xodim vakolatini buzib, foydalanuvchilarning o‘ziga berilmagan ma'lumotlarini qarasa, kompaniya uchun avval qilgan xizmatlari ham inobatga olinmay, darhol ishdan bo‘shatiladi.
O‘zingiz Facebook haqida nimalarni so‘zlashni xohlaysiz?
— Facebook kabi top-texnologik kompaniyalarda ishga qabul qilinish yetarlicha tayyorgarlik bilan to‘liq real hodisa ekanligini aytishni xohlardim.
Intervyu jarayoni ko‘plab texnologik kompaniyalarda bir xil. Asosan intervyularda nomzodlar uchun algoritmik savollar beriladi va ularga oldindan tayyorlanish mumkin.
Shaxsan o‘zim uchun bunga tayyorlanish 4-5 oy vaqt talab etgan va sarflangan vaqt o‘zini oqlagan.
