Innovatsion rivojlanish vazirligi huzurida Xalqaro molekulyar allergologiya markazi tashkil etiladi 

O‘zbekiston Vazirlar Mahkamasining qarori bilan Innovatsion rivojlanish vazirligi huzurida Xalqaro molekulyar allergologiya markazi tashkil etiladi. 

Hujjatda aytilishicha, mazkur qaror yetakchi xorijiy mutaxassislarni jalb etgan holda ilmiy-diagnostik, ta'lim va ishlab chiqarishga oid innovatsiyalarni rivojlantirish, allergik kasalliklarni diagnostika qilish va davolashning molekulyar va boshqa ilg‘or usullarini tatbiq qilish hamda ko‘rsatilayotgan tibbiy xizmatlar sifatini oshirish maqsadida qabul qilindi.

Xalqaro markaz faoliyatining asosiy vazifa va yo‘nalishlari etib quyidagilar belgilandi:

- ultrazamonaviy biologik mikrochiplarni qo‘llash orqali allergik kasalliklarni diagnostika qilish sohasida innovatsion texnologiyalarni rivojlantirish, shuningdek, shu kabi kasalliklarni davolash va profilaktika qilish;

- allergik kasallik shuningdek, shoshilinch ma'lumotlarni o‘z ichiga oluvchi "allergik pasport" yaratish;

- allergen o‘simliklar gulchangining aerobiologik monitoringini va changlatish prognozini aniqlash, kelrysida bu haqida aholini xabardor qilish, allergenli o‘simliklarning gullash taqvimini yaratish;

- oziq-ovqat mahsulotlarini tamg‘alashni anafilaktik reaksiya rivojlanish xavfi mavjudligini inobatga olgan holda jahon standartlariga moslashtirish va ularni oziq-ovqat sanoatiga bosqichma-bosqich joriy etish;

- molekulyar allergologiya sohasida ilmiy tadqiqotlar o‘tkazilishini tashkil etish va tadqiqotlarni amalga oshirilishida ko‘maklashish;

- molekulyar allergologiya bo‘yicha vrachlar malakasini oshirish o‘quv dasturlarini va uslubiy adabiyotlarni ishlab chiqish;

- molekulyar allergologiya sohasida mutaxassislarni shartnoma asosida malakasini oshirish va qayta tayyorlash;

- molekulyar allergologiya sohasida faoliyat yuritayotgan yosh olimlar va xorijlik ekspertlarni hamkorlikka jalb qilish uchun zarur shart-sharoitlar yaratish;

- xalqaro ilmiy-texnikaviy hamkorlik shakllarini rivojlantirishda ishtirok etish, jumladan, molekulyar allergologiyani rivojlantirish uchun jamg‘armalar va xalqaro dasturlar grantlarini jalb qilish orqali xorijlik hamkorlar bilan birgalikda ilmiy-texnikaviy va innovatsion loyihalarni amalga oshirish.

Xalqaro markaz o‘ziga yuklatilgan vazifalarni bajarishda Sog‘liqni saqlash vazirligining Respublika ilmiy ixtisoslashtirilgan allergologiya markazi, Fanlar akademiyasining Immunologiya va inson genomikasi instituti va boshqa ilmiy-tadqiqot muassasalari bilan yaqindan hamkorlik qiladi.