Yevroittifoq: AQShning JSSTni moliyalashtirishni to‘xtatish to‘g‘risidagi qarorini oqlab bo‘lmaydi
JSST Donald Trampning bu qarori tufayli budjetining 14 foizidan ortig‘ini yo‘qotishi mumkin.
Koronavirus pandemiyasiga qarshi kurash ketayotgan vaqtda AQShning Jahon sog‘liqni saqlash tashkilotini moliyalashtirishni to‘xtatish to‘g‘risidagi qarorini oqlab bo‘lmaydi. Bu haqda Yevroittifoq diplomatiyasi rahbari Jozep Borrel aytdi.
"AQShning JSSTni moliyalashtirishni to‘xtatish to‘g‘risidagi qaroridan chuqur afsusdaman. Koronavirus pandemiyasini jilovlash va pasaytirishda yordamlashish uchun har qachongidan ham ko‘proq harakat zarur bir paytda bu qadamni oqlash uchun hech qanday asos yo‘q", - dedi u.
Borrel "faqat birlashibgina chegara bilmaydigan bu inqirozni bartaraf etishimiz mumkin", deb ta'kidladi.
Avvalroq AQSh prezidenti Donald Tramp Vashington JSST budjetiga badallar to‘lashni to‘xtatayotganini ma'lum qilgandi.
JSST Donald Trampning bu qarori tufayli budjetining 14 foizidan ortig‘ini yo‘qotishi mumkinligini bildirdi.
