23:30 / 06.02.2021
9342
Bayden pandemiya sababli ishsiz qolgan ayolga qo‘ng‘iroq qildi va unga iqtisodiy rejasi haqida so‘zlab berdi

Oq uyning bildirishicha, AQSh prezidenti fuqarolar bilan doimiy muloqot qilib borishni rejalashtirgan.

Foto: Twitter/Joe Biden

AQSh prezidenti Jo Bayden pandemiya sababli o‘tgan yili ishini yo‘qotgan kaliforniyalik Mishel ismli ayol bilan telefon orqali suhbatlashdi va unga o‘zining iqtisodiyotni rag‘batlantirish bo‘yicha chora-tadbirlar dasturi haqida so‘zlab berdi. Ushbu suhbat to‘g‘risidagi videolavha Baydenning Twitter sahifasida joylashtirildi.

Baydenning yozishicha, avvalroq Mishel prezidentga maktub yozgan.

"G‘oyamiz shuki, biznesni qaytadan ochishni istaymiz. Biz yordamga muhtoj odamlarga zudlik bilan ko‘mak beradigan reja qabul qilamiz. Bu kichik biznesning ochilishiga yordam beradi", - dedi AQSh prezidenti.

U shuningdek, hukumat yaqin 100 kun ichida 100 mln kishini emlashga erishish niyatida ekanligini eslatdi.

Oq uy matbuot xizmatining ma'lum qilishicha, ushbu suhbat Baydenning aholi bilan muntazam muloqot qilish borasidagi dasturining bir qismi hisoblanadi.

Baydenning 1,9 trln dollar miqdoridagi iqtisodiy rejasida bevosita pandemiyaga qarshi kurashish uchun 400 mlrd dollar atrofida mablag‘ ajratish ko‘zda tutilgan. Bir trln dollarga yaqin mablag‘ aholiga yordam ko‘rsatish, qolgan qismi esa iqtisodiyotni rag‘batlantirishga yo‘naltiriladi. 29 yanvar kuni Bayden kongressni mazkur tashabbusni tezroq qabul qilishga chaqirdi.

Top