Abduqodir Toshqulov: OTMga hujjat topshirish tizimini raqamlashtirish orqali bir yilda 27 mlrd iqtisod qilinyapti

«Jurnal, baholash daftarchasi va boshqa hujjatlarni elektronlashtirish orqali bir oliy ta'lim muassasasi 1 yilda 100 mln so‘m iqtisod qilmoqda. Shuningdek, oliy ta'limga kirishda hujjat topshirishni raqamlashtirish hisobiga 27 mlrd so‘m iqtisod qilinmoqda.

Avvallari o‘qishga hujjat topshirayotgan abituriyent bitta papkaning ichiga hujjatlarini solib Surxondaryoning Bobotog‘ degan joyidan Toshkentga kelardi. Ammo tumanidagi poliklinikadan berilgan rentgen surati teskari tushib qolgani uchun uni yana Surxondaryoga qaytarishardi. Shu rentgenni Toshkentdan qilay desa, ruxsat yo‘q edi. Yoki poliklinikalarda faqat surat yopishtirish mumkin bo‘lgan «086» forma sotilardi. Noqulaylik juda ko‘p edi.

Hozir-chi? Abituriyent uyidan turib, yo‘nalishni tanlayapti va istagan o‘qishiga hujjat topshiryapti. Ochig‘ini aytish kerak, bizda qog‘oz sanoati ko‘proq import hisobiga bo‘ladi. Raqamlashtirish orqali esa bunda katta mablag‘ iqtisod qilinyapti», – deya vazir so‘zlarini keltirmoqda Kun.uz muxbiri.