Bir yilda tramvaydan foydalanuvchilar soni 654 mingga ko‘paygan.
Statistika agentligi ma’lumotlariga ko‘ra, O‘zbekistonda 2022 yilda tramvayda qariyb 3 mln yo‘lovchi tashilgan. Bu ko‘rsatkich 2021 yil bilan solishtirganda 654,3 mingga oshgan.
Ma’lumot uchun, hozir faqat Samarqand shahrida tramvaydan jamoat transporti sifatida foydalaniladi.
2022 yil noyabrida O‘zbekiston prezidentining Fransiyaga tashrifi doirasida Toshkent tramvay tizimini loyihalashtirish va qurish bo‘yicha kelishuvga erishilgan edi.
Kelishuvga ko‘ra, Fransiyaning Alstom mashinasozlik kompaniyasi Toshkentda 9,1 km uzunlikdagi tramvay liniyasini quradi, uning marshruti hozircha ma’lum qilinmadi. Bu liniyada yo‘lovchi tashish hajmi kuniga 78 ming kishini tashkil etishi reja qilingan. Qurilish boshlanishi 2024 yilning 2-choragiga mo‘ljal qilingan. Loyiha qiymati 167,4 mln yevroga baholangan.
