“Judayam chang, nafas olib bo‘lmaydi” – Toshkentda yo‘lovchilar iflos avtobusda tashilmoqda

“Uch qahramon”dan “Abu Saxiy”gacha harakatlanuvchi 121-avtobusning sanitar holati abgor. 20 yanvar sanasida ichi va atroflari chang-g‘uborga to‘la transport kun bo‘yi yo‘lovchilarga xizmat ko‘rsatgan.

Foto: Videodan kadr

Kun.uz'ga Yunusobod yo‘nalishining “9-dahasi (“Uch qahramon” ko‘chasi) – Chinni bozor” oralig‘ida harakatlanuvchi 121-sonli avtobusda tozalikka rioya qilinmagani ko‘rsatilgan videolar kelib tushdi.

Tasvirlarda transportning ichi va atroflari chang-g‘uborga to‘lgani ko‘rinadi. Murojaat yo‘llagan yo‘lovchilar avtobus har tebranganida ichidagi changlar havoga ko‘tarilib, odamlarni bezovta qilayotganini aytgan.

“Avtobus tozalikka umuman rioya qilmaydi. Judayam chang, nafas olib bo‘lmaydi. Mana sovuq kunda oynalar ochiq. [Yonimdagi yo‘lovchi] hozir niqob taqib oldilar”, – deydi avtobusda ketayotgan bir ayol.

Ma’lumotlarga ko‘ra, ayni holat 20 yanvar sanasi soat 13:22 hamda 21:15 larda kuzatilgan. Har ikki vaqtda olingan videolarda sanitar holat abgor ekani ko‘rinadi. Kun.uz vaziyat yuzasidan “Toshshahartransxizmat” AJga so‘rov yubordi.