Rossiya g‘allasi noqonuniy yo‘l bilan O‘zbekistonga eksport qilinayotgani aniqlandi

Qozog‘iston Moliyaviy monitoring agentligining (MMA) aniqlashicha, Rossiya g‘allasi Qozog‘iston niqobi ostida boshqa davlatlarga eksport qilinmoqda. Bu haqda agentlikka tayanib TASS xabar berdi. 

MMA ma’lumotlariga ko‘ra, mahalliy korxonalardan biri 2021-2022 yillarda O‘zbekiston, Afg‘oniston va Tojikistonga bir milliard tenge (2,2 million dollar) qiymatli 8,3 ming tonna Rossiya g‘allasini eksport qilgan. 

Qozog‘iston kompaniyasi imtiyozli eksport tarifini olish uchun mahalliy fermer xo‘jaliklarining g‘alla Qozog‘istonniki ekani haqidagi soxta hisob-fakturalaridan foydalangan. Kulrang sxemalar tranzit tarifidan qochish imkonini bergan. Hozirgi vaqtda tergov harakatlari davom etayotgani aytilmoqda. 

2022 yilda Rossiya fermerlari rekord darajada ko‘p - 153,8 million tonna g‘alla yetishtirdi. Biroq, G‘arb sanksiyalari va logistikaning uzilishi tufayli don omborlarda to‘planib qolayotgani va bu rossiyalik fermerlar uchun xavf tug‘dirayotgani xabar qilingandi.