Alisher Sa'dullayev Yoshlar ishlari agentligiga rahbar bo‘ldi

Prezident qarori bilan Sa'dullayev Alisher Zafar o‘g‘li O‘zbekiston Respublikasi Yoshlar ishlari agentligi direktori lavozimiga tayinlandi.

Shu munosabat bilan, Alisher Sa'dullayev Prezidentning yoshlar, fan, ta'lim, sog‘liqni saqlash, madaniyat va sport masalalari bo‘yicha maslahatchisining birinchi o‘rinbosari lavozimidan ozod etilgan.

Alisher Sa'dullayev 1994 yilning 11 iyulida Jizzax viloyatining Jizzax tumani (hozirgi Sharof Rashidov tumani)da tug‘ilgan. Toshkent shahridagi Singapur menejmentni rivojlantirish institutini tamomlagan, keyinroq Buyuk Britaniyada tahsil olgan.

2017 yil 30 iyun kuni Toshkent shahridagi Simpoziumlar saroyida bo‘lib o‘tgan «Kamolot» yoshlar ijtimoiy harakatining navbatdagi Qurultoyi vaqtida chiqish qilgan 23 yoshli Alisher Sa'dullayev Xalq ta'limi vaziriga o‘rinbosar etib tayinlangan edi. O‘zbekiston tarixidagi eng yosh vazir o‘rinbosari 2018 yil oktyabrida vazirlikdan ketdi, ko‘p o‘tmay Yoshlar ittifoqi Markaziy Kengashi raisiga o‘rinbosar bo‘ldi.

U 2019 yil avgustida Qahramon Quronboyev o‘rniga Yoshlar Ittifoqiga rais bo‘ldi, 2020 yil yanvarida esa prezident uni senator -  O‘zbekiston Respublikasi Prezidentining yoshlar, fan, ta'lim, sog‘liqni saqlash, madaniyat va sport masalalari bo‘yicha maslahatchisining birinchi o‘rinbosari etib tayinladi.

Eslatib o‘tamiz, 2019 yilning dekabrida Yoshlar ittifoqi agentlikka aylanishi haqida xabar tarqalgandi.

2020 yilning 30 iyunida prezident farmoni bilan Yoshlar ishlari agentligi tashkil etildi.