Yoshlar ittifoqi agentlikka aylanmoqda

O‘zbekiston Respublikasi prezidenti Shavkat Mirziyoyev 27 dekabr kuni Muhammad al-Xorazmiy nomidagi maktabda yoshlar bilan o‘tkazilgan uchrashuvda Yoshlar ittifoqi tashkiloti muammolariga to‘xtalib, endilikda yoshlar masalasida to‘g‘ridan-to‘g‘ri davlat bilan ishlaydigan tashkilot ochishga ehtiyoj paydo bo‘layotganini qayd etib o‘tgan.

Prezidentning Yoshlar ittifoqi negizida Yoshlar ishlari agentligi tashkil etish tashabbusi yig‘ilganlar tomonidan qo‘llab-quvvatlandi.

Kun.uz muxbiri aniqlik kiritishicha, prezident bosh vazir Abdulla Aripov, prezidentning yoshlar, fan, ta'lim, sog‘liqni saqlash va sport masalalari bo‘yicha maslahatchisi Abdujabbor Abduvohidov hamda Yoshlar ittifoqi raisi Alisher Sa'dullayevga bir oy muddat ichida rivojlangan mamlakatlarning ilg‘or tajribasidan kelib chiqib, Yoshlar Ittifoqi negizida Yoshlar ishlari agentligini tashkil etish, «Yoshlar – kelajagimiz» jamg‘armasi samaradorligini oshirish bo‘yicha taklif kiritish topshiriq qilingan.

Yoshlar ittifoqi matbuot xizmatidagi manba Kun.uz’ga nodavlat notijorat tashkilot agentlikka o‘zgarayotganini tasdiqladi va bir oy ichida katta ishlar amalga oshirilishini aytib o‘tdi. Uning so‘zlariga ko‘ra, yangi agentlik prezident administratsiyasi qoshida tashkil etilishi kutilmoqda.

Eslatib o‘tamiz, Yoshlar ittifoqi 2,5 yil muqaddam, 2017 yilning 30 iyunida 2001 yildan buyon faoliyat ko‘rsatib kelgan «Kamolot» Yoshlar ijtimoiy harakati o‘rnida tashkil etilgandi. Tashkilotga 2017-2019 yillarda Qahramon Quronboyev raislik qildi, 2019 yil avgustida esa u ishdan bo‘shatilib, uning o‘rnini o‘rinbosari Alisher Sa'dullayev egalladi.

Yangi agentlik tashkil topganidan keyin Alisher Sa'dullayev prezidentning yoshlar, fan, ta'lim, sog‘liqni saqlash, madaniyat va sport masalalari bo‘yicha maslahatchisi birinchi o‘rinbosari - agentlik direktori hisoblanadi.